Muhtar Ábilázovtiń isi boıynsha aldyn ala sot tyńdaýy ótti
ALMATY. QazAqparat - Búgin Almaty qalasyndaǵy qylmystyq ister boıynsha aýdanaralyq mamandandyrylǵan sotta alaıaq bankır, «BTA bankiniń» basshysy Muhtar Ábilázovke qatysty qylmystyq is boıynsha aldyn ala sot tyńdaýy ótkizildi.
Sottalýshylar oryndyǵynda syrttaı sottalatyn M. Ábilázovten bólek onyń úsh sybaılasy - «BTA bankiniń» basqarma tóraǵasynyń eks-birinshi orynbasary-nesıe berý komıtetiniń tóraǵasy Jaqsylyq Járimbetov, nesıeleý boıynsha eks-dırektor Qaırat Sadyqov jáne «BTA bankiniń» burynǵy basqarma tóraǵasy Sadýaqas Mámesh otyr.
Buǵan deıin qylmystyq iske qatysýshylarǵa, sonyń ishinde M. Ábilázovtiń qorǵaýshysyna aıyptaý aktisi tapsyryldy. 2017 jyldyń 1-inshi jáne 14-inshi aqpanynda Sybaılas jemqorlyqqa qarsy is-qımyl jónindegi Ulttyq bıýro Qylmystyq-protsessýaldyq kodekstiń talaptaryna sáıkes, otandyq jáne sheteldik BAQ-tarda materıaldar shyǵarý jolymen M. Ábilázovti sotqa kelý týraly habardar etti. Alaıda, ol sotqa kelgen joq jáne kelýine kedergi keltiretin sebepter jóninde de habarlaǵan joq.
Alaıaq bankırdiń isiniń keıipkerlerine qylmys jasaý, bótenniń múlkin ıelený jáne jumsaý, zańsyz jolmen tabylǵan aqshany zańdastyrý, banktiń qarajatyn zańsyz paıdalaný, ókilettikterin asyra paıdalaný maqsatynda qylmystyq qaýymdastyq uıymdastyrdy jáne qurdy degen aıyptar taǵylyp otyr. Al M. Ábilázovtiń ózi Qazaqstan Respýblıkasynyń Qylmystyq kodeksiniń alty baby boıynsha aıyptalýda: atap aıtqanda, olar «Qylmys jasaý maqsatynda qylmystyq qaýymdastyq uıymdastyrý jáne qurý», «Senip tapsyralǵan bótenniń múlkin ıelený jáne jumsaý», «Senip tapsyrylǵan bótenniń múlkine qastandyq jasaý jáne jumsaý», «Qylmystyq jolmen tabylǵan aqsha men múlikti zańdastyrý», «Banktiń aqshasyn zańsyz jolmen paıdalaný», «Ókilettikterin asyra paıdalaný». Sottalýshylardyń qylmystyq is-qımyldardyń nátıjesinde memleketke 1,557 trıllıon teńgeden astam soma kóleminde zalal kelgen.
Buǵan deıin Sybaılas jemqorlyqqa qarsy is-qımyl jónindegi ulttyq bıýro M. Ábilázov pen onyń sybaılastaryna qatysty qylmystyq is boıynsha sotqa deıingi tergeý sharalary aıaqtalyp, is prokýratýra organdary arqyly sotqa jóneltilgenin habarlaǵan edi.
Qashqyn bankır Muhtar Ábilázovtiń qylmystyq isi boıynsha basty sot otyrysy aǵymdaǵy jyldyń 3-inshi sáýirine belgilendi. Bul týraly Almaty qalasyndaǵy qylmystyq ister boıynsha aýdanaralyq mamandandyrylǵan sottyń tóraǵasy Martbek Kákimjanov habarlady. Alǵashqy sot tyńdaýynda tóraǵalyó etýshi sýdıa sottalýshylardy qorǵaýshy taraptyń ótinish hattaryn qanaǵattandyrýsyz qaldyrdy. Alaıda sottalýshy Sádýaqas Mámeshteginiń qorǵaýyn qamtamasyz etetin qorǵaýshy Klımenkoǵa qylmystyq istiń materıaldarymen tanysýǵa ruqsat berildi. Sonymen qatar, sot basty sot otyrysy ótetin kún men ýaqyt belgilengeni týraly habarlamany respýblıkalyq jáne basqa jalpyǵa qoljetimdi BAQ-tarda jarııalaýdy uıymdastyrý jóninde qaýly shyǵardy. Sottyń qaýlysyna sáıkes, so otyrystary ár aptada úsh kún saıyn ótip otyrmaqshy.
Atap aıtarlyǵy, qylmystyq is boıynsha basty aıyptalýshy - «BTA banki» AQ-nyń burynǵy basshysy Muhtar Ábilázov sotqa kelgen joq. Sot protsesine qatysýshylardyń barlyǵy sottyń Ábilázovsyz ótýine eshqandaı qarsylyq bildirgen joq.
Ámirlan Álimjan
