Muhtar Ábilázov BTA bankten urlaǵan aqshasyn Seıshel araldaryna shyǵarǵan

Almaty qalasynyń qylmystyq ister jónindegi mamandandyrylǵan aýdanaralyq sotynda qashqyn bankır Muhtar Ábilázov pen onyń sybaılastaryna qatysty qylmystyq isti qaraý odan ári jalǵasýda. Sottyń búgingi otyrysynda BTA bankten Seıshel araldaryndaǵy offshorlyq kompanııalar arqyly aqsha jymqyrýǵa qatysty birneshe epızod qarastyryldy.  

Jábirlenýshi tarap - BTA banktiń ókili Temirlan Nyǵmetov sot otyrysynda málim etkenindeı, 2007 jyldyń aqpan aıynda Seıshel araldarynda tirkelgen «Beltor Limited» kompanııasy BTA bankten kóp mıllıondaǵan nesıe alýǵa ótinish beredi. Nesıeni alýdaǵy negizgi maqsat - Almaty qalasy men Almaty oblysynan jyljymaıtyn múlik satyp alý dep kórsetiledi. Atap aıtarlyǵy, «Beltor Limited» kompanııasynyń jarǵylyq qory bar-joǵy 5000 AQSh dollaryn quraǵan.

Sóıtse de, nesıelik ótinimniń tolyq jalǵandyǵyna: ıaǵnı, kepilge qoıylǵan múliktiń bolmaýyna, kompanııanyń shyqqan teginiń belgisizdigine, onyń tólem qabiletiniń anyqtalmaǵanyna qaramastan, nesıe beriledi. Bul jerde BTA bank basshylyǵynyń nesıe komıtetine berilgen tikeleı tapsyrmasy sheshýshi ról oınaıdy. Saıyp kelgende, bir kúndik is-áreket úshin qurylǵan kompanııanyń ótinishi jedel qanaǵattandyrylǵan. Qajetti saraptamalar jasalmaǵan. Budan baıqalǵanyndaı, Muhtar Ábilázov negizgi kompanııaǵa baǵynyshty offshorlyq aımaqtaǵy enshiles kompanııalarǵa nesıe berý úrdisin tikeleı ózi baqylaýynda ustaǵan.

«Qarjy urlaý úshin, «Beltor Limited» kompanııasynyń dırektorynyń atynan BTA bankten 29 mıllıon AQSh dollary kóleminde qaryz aqsha alýǵa ótinish jasalady. 2007 jyldyń 22 aqpanynda osy ótinish boıynsha nesıe komıteti zańsyz sheshimdi birden maquldaıdy. Sol sheshimge sáıkem, «Beltor Limited» kompanııasyna 29 mıllıon AQSh dollary kóleminde nesıe berý maquldanady. Bul másele nesıe komıtetiniń otyrysynda qaralmasa da, atalǵan hattamaǵa BTA banktiń basshylary Jaqsylyq Jarymbetov pen Roman Solodchenko qoldaryn qoıǵan»,- dedi sottaǵy sózinde BTA banktiń ókili Temirlan Nyǵmetov.

Aqsha urlaý kestesi osylaısha jalǵasa beredi. Arada eki aı ýaqyt ótkende «Beltor Limited» kompanııasynyń dırektory Djenıfer Reneniń atynan BTA bankten qaryz alýǵa ekinshi ret ótinish kelip túsedi. Bul joly nesıeniń somasy - 20 mıllıon AQSh dollary dep kórsetilgen. Kóp uzamaı bul ótinish te qanaǵattandyrylady. Túptep kelgende, «Beltor Limited» kompanııasyna shamamen 50 mıllıon AQSh dollary kóleminde nesıe berilgen. Atap aıtarlyǵy, bul qaryzdy bererden buryn kepilge eshqandaı múlik qoıylmaǵan jáne qaryz qaıtarylmaǵan. Muhtar Ábilázov «Beltor Limited» kompanııasyna berilgen qarajatty áýeli Latvııadaǵy bankterdiń birine aýdaryp, keıinirek offshorlyq aımaqtaǵy kompanııasyna jibergen.

Osyndaı aqsha urlaý kestesimen «Rimos Limited», «Wintera Holding», «Toros Limited», «Starwood Contract Limited», «Netgold Services Limited», «Higbond Associates Limited» jáne taǵy basqa kompanııalarǵa mıllıondaǵan nesıeler berilgen. Joǵaryda atalǵan kompanııalardyń barlyǵy Seıshel araldarynda tirkelgen.

Aıta ketelik, qashqyn bankır Muhtar Ábilázovtiń qylmystyq isi boıynsha basty sot otyrysy aǵymdaǵy jyldyń 3-inshi sáýirinde bastaldy. Qylmystyq istiń jalpy kólemi 2 224 tomnan turady. Aıyptaýshylar tiziminde 200-den astam kýágerler bar.