Muhıtta jasalǵan qylmys: Qytaıda kapıtan kisi qolynan qaza tapty

ASTANA. KAZINFORM – Shandýn provıntsııasyndaǵy Veıhaı teńiz polıtsııasy «Úndi muhıtynyń ashyq aıdynyna sapar shekken balyqshy kemesiniń kapıtany ekıpaj múshesiniń qolynan qaza tapty» degen aqparatty rastady. 

Veıhaı teńiz polıtsııasynyń málimdemesinde kúdiktiniń kemede qamaýǵa alynǵany aıtyldy. 

Naqtyraq aıtqanda, 11 naýryz kúni Jýnchen qalasyna tıesili balyqshylar kemesinde qandy qylmys bolyp, bir adam qaza tapqan. Tártip saqshylary 12 naýryz kúni osy oqıǵa boıynsha is qozǵaǵan, kúdikti qamalyp, keme sapardan qaıtyp keledi. Qylmystyq is zań aıasynda tergelip jatyr. 

Qylmystyq oqıǵa týraly eń alǵash kapıtannyń qyzy 20 naýryz kúni áleýmettik jelide jazba jarııalap, dabyl qaqqan bolatyn. Onyń aıtýynsha, ákesi byltyr maýsym aıynda balyqshy kemesimen alys saparǵa attanǵan. Jospar boıynsha bıyl maýsym aıynda oralýǵa tıis edi.  Alaıda 12 naýryz kúni ákesiniń kisi qolynan jazym bolǵany týraly sýyq habar jetken. 

— 11 naýryz kúni tańǵy 7:30 shamasynda Úndi muhıtynyń ashyq aıdynynda qandyqol ákemdi óltirip, denesin teńizge laqtyryp jibergen. Qanisherdi ekıpaj músheleri ustap otyr, al keme elge qaıtý týraly buıryq alǵan. Bul sapar shamamen 25 kúnge sozylady, sondyqtan keme sáýir aıynda elge jetýi tıis, - dep jazdy ol.

Ol The Paper aqparattyq portalyna bergen suhbatynda qylmysqa qatysty kemeniń «Lý Jýn ıÝan ıÝı» prefıksimen tirkelgenin aıtqan. Bul derek osydan on neshe jyl buryn Qytaıdy dúr silkindirgen taǵy bir atyshýly qylmysty ınternet qoldanýshylarynyń esine qaıta túsirip, qyzý pikirtalas týdyrdy.

2011 jyly «Lý Jýn ıÝı 2682» atty keme Tynyq muhıtynyń ashyq aıdynyna shyqqan saparynda ekıpaj músheleri arasynda qaqtyǵys týady. Saldarynan 16 adam qaza taýyp, 6 adam iz-tússiz joǵalyp ketedi. Jaǵaǵa tiri jetken 11 adamnyń barlyǵy sottalyp, 5-eýi ólim jazasyna kesilgen bolatyn.

Eske sala keteıik, Soltústik Koreıanyń 20 teńizshisi Qytaı aýmaǵynda keme apatynan qaza tapqanyn jazǵan edik.