Muhıt Tursynov «Qazaqstan Barysy-2014» jeńimpazy atandy
ASTANA. QazAqparat - Búgin Astanadaǵy "Saryarqa" kesheninde "Qazaqstan Barysy-2014" ataǵy úshin qazaq kúresinen respýblıkalyq týrnır ótti.
Aqtyq synda Qaraǵandy oblysynyń ókili Asyl Bármenov pen Shyǵys Qazaqstan namysyn qorǵaǵan Muhıt Tursynov beldesken bolatyn. Munda eki palýan da birin-biri ala almaı, negizgi ýaqytty ıtjyǵyspen aıaqtaǵan. Qosymsha mınýt belgilengen soń, qarsylastar qoıan-qoltyq saıysqa tústi. Ol beldesýde shyǵysqazaqstandyq Muhıt Tursynov óz qarsylasyn beldiginen kóterip alyp, alań syrtyna shyǵaryp jiberdi.
Qola júlde "Syr barysy" Rýslan Ábdirazaqovqa buıyrdy. Úshinshi oryn úshin talasta ol "Talas arlany" Dáýlethan Jaqypovty (Jambyl oblysy) tize búktirdi. Degenmen Dáýlethan Jaqypov kórermen kózaıymyna aınalyp, sý jańa avtokólikke ıe boldy.
Aıta keteıik, "Qazaqstan Barysy" ataǵynyń ıegeri 150 myń AQSh dollaryn jáne altyn "Taıtuıaq" utyp aldy.
