Muhıt Tursynov bıylǵy «Qazaqstan Barysynan» shettetildi

Qazaqstan Respýblıkasy qazaq kúresi federatsııasy Atqarý komıtetiniń otyrysy ótkenin habarlaıdy. Atqarý komıtetiniń otyrysynda 2016 jylǵy 10 sáýir kúni Semeı qalasynda uıymdastyrylǵan Qazaqstan Respýblıkasynyń Tuńǵysh Prezıdenti - Elbasy N.Á.Nazarbaevtyń júldesi úshin qazaq kúresinen «Qazaqstan Barysy» respýblıkalyq týrnıriniń Shyǵys Qazaqstan oblystyq irikteý jarystarynyń úshinshi - oblystyq kezeńiniń máseleleri talqylandy. Atap aıtqanda, irikteý kezeńi barysynda kúsh synasqan Dáýren Nuralınov pen Muhıt Tursynovtyń beldesýine qatysty órbigen daý qaraldy.

Atalǵan kezdesý «A» tobyndaǵy D.Nuralınovtyń birinshi, M.Tursynovtyń ekinshi beldesýi bolǵan. Beldesýdi taldaý barysynda D.Nuralınovtyń jattyqtyrýshysy A.Arqabaevtyń Federatsııaǵa 19.04.2016 jyly jazǵan aryzy, jarys hattamalary, jarystyń bas tóreshisi Sh.Tursynovtyń, kilem jetekshisi J.Oralbekovtyń, ortadaǵy tóreshi B.Aqjigitovtyń jáne qaptaldaǵy tóreshi E.Konkıevtiń, jarysqa baqylaý jasaýǵa Federatsııa tarapynan ókil retinde jiberilgen qazaq kúresinen memlekettik jattyqtyrýshy M.Jaqyttyń beldesýge qatysty túsiniktemeleri, jalpy týrnırdiń jáne naqty atalǵan beldesýdiń beıne túsirilimi negizge alyndy. Atqarý komıteti atalǵan materıaldardy qaraý jáne beldesýdiń beınetúsirilimin taldaý barysynda beldesýge tóreshilik jasaǵan tóreshilerdiń óreskel qatelikterge jol bergendigin jáne sol arqyly balýan M.Tursynovtyń jeńiske jetýine jaǵdaı jasaǵandyǵyn anyqtady.

Mysaly, beldesýdiń úshinshi mınýtynda D.Nuralınov ádis jasaý arqyly M.Tursynovtyń eki jaýyrynyn jerge tıgizip, taza jeńiske qol jetkizgen. Ortadaǵy tóreshi B.Aqjigitov bul ádisti «taza jeńis» dep baǵalaǵanymen kilem jetekshisi J.Oralbekov B.Aqjigitov pen qaptaldaǵy tóreshi E.Konkıevty shaqyryp alyp, tóreshilerdiń pikirin ózgertýge májbúrlegen. Nátıjesinde tóreshiler ádisti «jartylaı jeńis» dep baǵalap, kezdesýdi jalǵastyrǵan. Buǵan D.Nuralınovtyń jattyqtyrýshysy A.Arqabaev qamshy kóterip, narazylyǵyn bildirmegen. Sondaı-aq, osy ádisten keıingi beldesý barysynda D.Nuralınovtyń jasaǵan ádisteri durys eseptelinbegen, upaı berilmegen. Kerisinshe, D.Nuralınovqa orynsyz eskertýler jasalǵan. Beldesý barysynda kilem jetekshisi J.Oralbekov ortadaǵy tóreshi men qaptaldaǵy tóreshini ózine shaqyryp, sondaı-aq mıkrofon arqyly tıisti nusqaýlar bergen jáne osyǵan oraı tóreshiler B.Aqjigitov pen E.Konkıev kilem jetekshisiniń yńǵaıyna jyǵylǵan. Nátıjesinde, tóreshiler beldesýdiń negizgi ýaqytynda upaı sanyn teń qylyp, qoıan-qoltyq beldesýge jetkizgen. Qoıan-qoltyq beldesý barysynda M.Tursynov jeńiske jetken. Beldesýden soń D.Nuralınovtyń jattyqtyrýshysy Uıymdastyrý komıtetine nemese tóreshiler alqasyna qazaq kúresiniń erejesine sáıkes 30 (otyz) mınýttyń ishinde beldesýdiń nátıjesine qatysty narazylyq hatyn túsirmegen.

Joǵaryda kórsetilgen derekterdi negizge ala otyryp, Federatsııanyń Atqarý komıteti tómendegideı qaýly qabyldady:

1. Osy irikteý týrnıriniń Bas tóreshisi bolyp bekitilgen Sh.Tursynovtyń osyǵan deıin tóreshilik qyzmeti barysynda jibergen qatelikteri úshin Federatsııa tarapynan 2014 jyldyń qańtarynan 2016 jyldyń qańtaryna deıin eki jylǵa tóreshilikten shettetilgenin jáne tóreshilikke qaıta kiriskenine úsh aı ǵana ýaqyt ótkendigin eskere otyryp, osy jarystyń barysynda erejeniń óreskel buzylýyna jol bergendigi úshin Sh.Tursynov qazaq kúresiniń barlyq deńgeıdegi jarystarynyń tóreshiliginen múldem alastatyldy.

2. Jarystyń kilem jetekshisi bolǵan J.Oralbekov atalǵan beldesý barysynda durys sheshim qabyldamaǵany, kilemdegi jáne qaptaldaǵy tóreshilerdiń ádiletti tóreshilik jasaýyna kedergi keltirgendigi úshin qazaq kúresiniń barlyq deńgeıdegi jarystarynyń tóreshiliginen bes jyl merzimge shetettildi.

3. Osy kezdesýde kilemdegi tóreshi qyzmetin atqarǵan B.Aqjigitov jáne qaptaldaǵy tóreshi E.Konkıev beldesý barysynda ádil tóreshilik jasamaǵandary úshin bir jyl merzimge qazaq kúresiniń barlyq deńgeıdegi jarystarynyń tóreshiliginen shetettildi.

4. Federatsııanyń atynan Qazaqstan Respýblıkasy Mádenıet jáne sport mınıstrligi Sport jáne dene shynyqtyrý isteri komıtetine atalǵan tóreshilerdi tóreshilik dárejelerinen aıyrý týraly usynys hat joldandy.

5. Federatsııa tarapynan irikteý týrnırine baqylaý jasaýǵa barǵan memlekettik jattyqtyrýshy M.Jaqytqa jarystyń ádil ótýine baqylaý jasamaǵany úshin qatań eskertý jasaldy.

6. D.Nuralınovtyń jattyqtyrýshysy A.Arqabaev beldesý barysynda birde-bir ret qamshy kóterip, kúres ádisteriniń durys baǵalanbaýyna narazylyq tanytpaǵandyqtan jáne beldesý sońynda erejege sáıkes 30 (otyz) mınýttyń ishinde tóreshilerdiń sheshimderine qatysty Bas tóreshiniń atyna narazylyq hatyn jazbaǵandyqtan týrnırdiń nátıjesi ózgerissiz qaldyryldy.

7. Іrikteý synynyń ádiletti ótpeýine baılanysty, kórsetilgen faktilerdi eskere otyryp, M.Tursynovty «Qazaqstan Barysy» respýblıkalyq týrnıriniń 2016 jylǵy aqtyq synyna jibermeý týraly sheshim qabyldandy.

8. «Qazaqstan Barysy» respýblıkalyq týrnıriniń 2016 jylǵy aqtyq synynyń joldamasy Shyǵys Qazaqstan oblysynyń irikteý syndarynda úshinshi oryn alǵan A.Qusaıynovqa berildi.

9. Іrikteý týrnırin uıymdastyrý, ótkizý barysynda óreskel qatelikterge jol bergeni jáne tıisti sharalar qabyldamaǵany úshin Shyǵys Qazaqstan oblystyq qazaq kúresi federatsııasyna 2 000 000 (eki mıllıon) teńge mólsherinde aıyppul salyndy.

Qazaqstan Respýblıkasy qazaq kúresi federatsııasy alty jyldyń ishinde el yqylasyna bólengen, qazaq kúresiniń damýyna yqpal etken «Qazaqstan Barysy» respýblıkalyq týrnıriniń Shyǵys Qazaqstan oblystyq irikteý jarystary barysynda qatelikterge jol berilgendigine ókinish bildiredi, ári bolashaqta osyndaı jaǵdaılardyń qaıtalanbaýyna kúsh salady.