Muhıt túbine jasyrynǵan tylsym jer: BBC Mańǵystaýdyń erekshe tabıǵatyn kórsetti

ASTANA. KAZINFORM — Halyqaralyq BBC arnasy Mańǵystaý oblysynyń tabıǵaty erekshe óńirin túsirdi. «The alien lands once hidden beneath the ocean» («Muhıt túbine jasyrynǵan tylsym jer») atty BBC Reel platformasynda jarııalanǵan  beınerolık óńirdiń geologııalyq tarıhyna arnalǵan.

Týrızm jáne sport mınıstrligi Týrızm ındýstrııasy komıteti málimetinshe, materıalda Mańǵystaýdyń jer betinde sırek kezdesetin erekshe kórinisteri, atap aıtqanda, mıllıondaǵan jyl buryn ejelgi muhıt túbinde qalyptasqan ústirtter, shatqaldar men jartastar beınelengen. Sıýjet avtorlary qazirgi Batys Qazaqstan aýmaǵy ejelgi teńizdiń túbi bolǵanyn atap ótip, bul óńirdiń bederi men qurylymy ózge ǵalamshar landshaftyna uqsas ekenin aıtady.

Beınematerıalda sondaı-aq Mańǵystaýdyń mádenı jáne týrıstik áleýeti keńinen ashyp kórsetiledi. Biregeı tabıǵaty, tarıhy men dástúri úılesken bul óńir keıingi jyldary týrıster arasynda tanymal bolyp keledi.

BBC túsirgen materıal Qazaqstannyń týrıstik áleýetin halyqaralyq deńgeıde tanystyrýǵa yqpal etip, sheteldik aýdıtorııanyń elimizdiń tabıǵı jáne mádenı murasyna degen qyzyǵýshylyǵyn arttyrady.

Aıta keteıik, bıyl shilde aıynda Qazaqstan Respýblıkasy Úkimetiniń qaýlysymen 2025-2029 jyldarǵa arnalǵan «Mańǵystaý» týrıstik óńirin damytý jónindegi keshendi jospar bekitilgen bolatyn.

Qujat toǵyz baǵytty qamtıdy jáne 102 is-sharadan turady. Jospar aıasynda óńirdiń týrıstik ınfraqurylymyn keńeıtý kózdelgen.

Negizgi mindetterdiń qatarynda Bozjyra, Tamshaly, Jyǵylǵan, Torysh, Shaqpaq-Ata, Saýra jáne Qyzylqup sııaqty tabıǵı jáne mádenı nysandarǵa qoljetimdilikti arttyrý bar.

Sonymen qatar Kendirli kýrortty óńirin damytýǵa erekshe mán berilgen. Josparǵa sáıkes kólik baǵyttaryn salý men qaıta jańartý, ınjenerlik jeliler men týrıstik nysandardyń qurylysy, onyń ishinde áýejaı men avtovokzal salý qarastyrylǵan.

2026 jyly ıÝNESKO Mańǵystaý meshitterin Búkilálemdik mura tizimine qosý máselesin qaraıdy.