Muhıt deńgeıiniń kóterilýi ǵalymdardy shoshytyp otyr
ASTANA. QazAqparat - Álemde muhıttardyń deńgeıi úlken qarqynmen kóterilip jatyr. Adam shoshyrlyq jaǵdaı NASA jer serikteri túsirgen sýretterden keıin belgili bolǵan.
Álemdegi sý qorynyń jyldam artýyna klımattyń tez ózgerýi men polıarly muzdardyń erýi sebep. Ǵalymdar munyń sońy «qurlyq kóleminiń qysqaryp, jaǵalaýǵa jaqyn mańda turatyn adamdardyń ómirine qaýip tóndirýi múmkin» dep dabyl qaǵýda. NASA Jer sharyn jerserikteri arqyly kóp jyl boıy sýretke túsirdi. Osy kadrlardy muqııat zerttegen ǵalymdar álemdik muhıt deńgeıi klımattyq ózgerister saldarynan kúrt kóterilgenin anyqtaǵan. Bul zertteýler AQSh pen Frantsııanyń ǵarysh agenttikteri birlese júrgizgen «Djeıson-3» jobasynyń aıasynda jasaldy. Mamandardyń málimeti boıynsha, teńiz deńgeıi 1992 jyldan beri ortasha eseppen alǵanda 8 santımetrge kóterilgen. Ǵalymdar zertteý úderisi áli jalǵasatynyn aıtady.
«Kóptegen ǵalymdar teńiz deńgeıi 2100 jylǵa qaraı bir metrge kóteriledi dep esepteıdi. Basqa esepter boıynsha, tipti bir jarym metrge deıin jetýi múmkin. Mine, osy kezde naǵyz apat bolmaq»,-deıdi NASA jobasyna qatysýshy Djosh Ýıllıs.
Bul úderis jalǵasa bermek. Jer sharynda klımat jylynyp, ystyq bolǵan saıyn, muzdar erip, muhıttar deńgeıi kóterile túsedi.
Ǵalymdar buryn júz jylda bir ret qana bolyp kelgen sý tasqyndary endi ár 10 jyl saıyn qaıtalanatyndyǵyn aıtyp otyr, dep habarlaıdy 24.kz.
