Muhammed paıǵambardyń «Zulpyqary» jáne basqa da sýyq qarý kórmege qoıyldy
PETROPAVL. QazAqparat - Petropavlda XV óńiraralyq yntymaqtastyq forýmy aıasynda sýyq qarý kórmesi ashyldy. Soltústikqazaqstandyq sheber Vıktor Javoronkov óziniń jeke kollektsııasyndaǵy 40-tan astam qarý túrin kórermen nazaryna usyndy, dep habarlaıdy QazAqparat.
Temirden túıin túıgen Vıktor Javoronkov qarý-jaraq jasaýmen 20 jyldan beri aınalysyp keledi. Sham bolatynyń qupııasyn ashqan sheber bir qarýdy jasaýǵa 3 aıǵa jýyq ýaqytyn jumsaıdy. Alty myńǵa jýyq juqa qabattan turatyn bolat qarýlardan álem halyqtarynyń tarıhyn, mádenıetin kórýge bolady.
«Sýyq qarýmen aınalysa bastaǵanda Sham bolatynan jasalǵan dúnıelerge suranystyń joǵary ekenin baıqadym. Tehnologııany meńgerdim. Jalpy, qarý-jaraq istegende onyń ádemiligine ǵana emes, sondaı-aq tarıhyna da asa mán beremin», -deıdi Vıktor Javoronkov.
Kórmege qoıylǵan jádigerlerdiń ishindegi eń kórnektisi - qazaq qarýlary. Qazaqtyń semser, selebesinen basqa, Muhammed paıǵambardyń Zulpyqaryn da kórýge bolady. Ańyz boıynsha bul qylysh ıslamdy moıyndaǵysy kelmegen taıpalardan tartyp alynǵan eken. Qarý paıǵambardyń qolynda sıqyrly kúshke ıe bolady. Keıin kúıeý balasy Álı Zulpyqardy Efrat ózenine tastaǵan desedi.
«Mundaı kórmeni tamashalaý bir ǵanıbet. Ár qarýdyń óz tarıhy bar. Qanshama maǵlumat alýǵa bolady. Osydan-aq, avtordyń óner týyndysyn jasamas buryn ádebıetpen, kóptegen qujattarmen jumys istegenin kóremiz»,-deıdi kórmege kelýshi Sergeı Chepýrko.
Kórmege qoıylǵan sýyq qarýdyń barlyǵy ańyzdardyń jelisi boıynsha jasalǵan. Kollektsııada japon, túrik, reseı qarýlary, sondaı-aq, saqtardyń «akınaǵy» da bar. Vıktor Javoronkovtyń óneri kópke tanymal. Ol buǵan deıin óz týyndylaryn Astana men Máskeýge kórmege apardy. Endi soltústikqazaqstandyqtar da sýyq qarý kórmesin Petropavldaǵy Abylaıhan rezıdentsııasynda tamashalaı alady.
Avtor: Aqerke Qabykeeva
