Muhammed paıǵambar týraly túsiriletin telehıkaıaǵa 1 mıllıard dollar bólinbek
ASTANA. 20 jeltoqsan. QazAqparat - Muhammed paıǵambar jaıynda túsiriletin telehıkaıaǵa 1 mıllıard dollar bólinetin boldy.
Bul týraly jobaǵa jetekshilik etetin katarlyq Alnoor Holding kompanııasy málimdedi, dep habarlaıdy Lenta.ru Agence France-Presse agenttigine silteme jasap.
Serıal 7 tolyqmetrajdy fılmnen turmaq. Fılmder ıslam, Muhammed tulǵasy týrasynda Batysta qalyptasqan jalǵan pikirdi buzý úshin aldymen aǵylshyn tilinde, keıin ózge tilderde jaryqqa shyǵady dep josparlanýda. Álemniń eń yqpaldy sýnnıt-ımamdarynyń biri ıÝsýf ál-Karadavı múshelik etetin sarapshylar toby hıkaıanyń stsenarıin jazyp bitirdi. Degenmen túsirilim jumystary qashan bastalatyndyǵy jóninde Alnoor Holding kompanııasy tis jarǵan joq.
Alnoor Holding atalmysh joba jóninde 2009 jyly aıta bastaǵan bolatyn. Ol kezde serıaldyń prodıýseri «Vlastelın kolets» pen «Matrıtsa» fılmderimen jumys istegen Barrı Osborn (Barrie Osborne) bolady dep málimdelgen. Hıkaıaǵa tanymal akterlerdi, sonyń ishinde Gollıvýdta ataqtary jer jaratyn juldyzdardy tartý josparlanǵan. Ol kezde tek 150 mln. dollar jumsaý kózdelgen edi.
Túsirýge daıyndalyp jatqan fılmderdiń stsenarıi týraly tolyq aqpar joq. Belgilisi, Muhammed paıǵambar bul fılmde kórsetilmeıdi, sebebi onyń beınesin berýge tyıym salynǵan.
