Muhammed Álıdiń ólim aýzynda jatqany týraly habardy qyzy joqqa shyǵardy

Esterińizge sala ketsek, buǵan deıin birqatar aqparat quraldary boksshynyń aǵasy Rahman Alıge silteme jasap 71 jastaǵy chempıonnyń sóıleýge áli joq ekenin jáne týǵan aǵasyn tanýdan qalǵandyǵyn jarııalaǵan bolatyn. «Muhammed Alı birneshe aıdan soń, múmkin birneshe kúnnen soń qaıtys bolýy yqtımal», - degen áńgimeni aǵasy Rahman Álı aıtty delingen edi.

Alaıda ataqty boksshynyń qyzy muny ósek-aıańǵa telidi. «Ákem ózin jaqsy sezinedi. Al bundaı qańqý sózder ylǵı shyǵyp turǵanymen, shyndyqqa esh janaspaıdy», - dedi amerıkalyq BAQ-qa bergen suhbatynda boksshynyń qyzy.

Onyń aıtýynsha, Muhammed Álı qazirgi kúni Arızona shtatyndaǵy úıinde AQSh Ulttyq fýtbol lıgasynyń chempıonyn anyqtaıtyn matchtardy tamashalaýda. «Ol Baltımor komandasynyń jankúıeri»,- dep qosty Meı Meı Alı.

Eske salsaq, M.Alı 1942 jyly 17 qańtarda Lýısvıllde dúnıege keldi. Orta aýyr salmaqta Olımpıada chempıony, kásibıler arasynda aýyr salmaqta úsh dúrkin álem chempıony. Sońǵy 27 jyl boıy boksshy Parkınson syrqatymen aýyrady.