Muhammed Álıdiń boks qolǵaptary 500 myń dollarǵa satylady
ASTANA. QazAqparat - Aty ańyzǵa aınalǵan boksshy Muhammed Álıdiń qolǵaptary AQSh-taǵy aýktsıonda satylymǵa qoıylmaqshy. 1964 jyly ol Sonnı Lıstondy jeńip, aýyr salmaq dárejesinde álem chempıony ataǵyn jeńip alǵan bolatyn, dep jazady RBK.
Bul biregeı lotty satylymǵa Heritage Auctions aýktsıondyq úıi qoıǵan. Baǵalaý quny $500 000 bolatyn boksshy qolǵaptaryn tapsyryspen jasaǵan belgili sheber Semmı Freger ony qoı men qozy terisinen tigip, eshki terisimen ádiptegen.
22 aqpan kúni ótkizý josparlanyp otyrǵan atalmysh aýktsıon 1964 jyly 25 aqpanda Maıamıde ótken jekpe-jektiń 50 jyldyǵyna arnalǵan.
Aıta keteıik, 1999 jyly Sports Illustrated pen Bı-Bı-Sı Muhammed Álıdi ǵasyr sportshysy dep ataǵan bolatyn. Ótken jyldyń kúzinde aýyr salmaq dárejesi boıynsha birneshe dúrkin álem chempıony jáne 1960 jylǵy Olımpıada altynynyń ıegeri Kankýnde WBC Búkilálemdik boksshylar keńesiniń 50-shi konventsııasynda «boks koroli» atandy.
Alaıda, ókinishke oraı, qazirgi tańda 72 jastaǵy ataqty sportshynyń týysqandary onyń densaýlyǵynyń nasharlap bara jatqanyn aıtady.
