Muhammed Álı, Maık Taısonmen qatar tur: GGG Halyqaralyq boks dańqy zalyna saltanatty túrde engizildi
ASTANA. KAZINFORM - AQSh-tyń Nıý-Iork shtatyndaǵy Kanastota qalasynda Halyqaralyq boks dańqy zalyna (IBHOF) qabyldaý rásimi ótti, dep habarlaıdy QR Ulttyq olımpıadalyq komıtetiniń baspasóz qyzmeti.
Qazaqstan tarıhynda alǵash ret bul tańdaýly qaýymdastyqtyń múshesi atanǵan sportshy – Gennadıı Golovkın boldy. Onyń sporttaǵy orasan zor jetistikteri resmı túrde moıyndalyp, ańyzǵa aınalǵan boksshy ári óz dáýiriniń eń úzdik sportshylarynyń biri retindegi mártebesin taǵy bir márte bekitti.
Gennadıı Golovkın Halyqaralyq boks dańqy zalyna alǵashqy múmkindikten-aq qabyldandy. Bul kásibı boks álemindegi eń joǵary qurmetterdiń biri sanalady. Endi onyń esimi Muhammed Álı, Maık Taıson, Floıd Meıvezer jáne Mennı Pakıao sekildi boks tarıhynyń uly tulǵalarymen qatar tur.
Qazaqstandyq boksshymen birge «Klass 2026» tizimine kelesi sportshylar endi:
Men’s Modern sanaty: Gennadıı Golovkın (Qazaqstan), Antonıo Tarver (AQSh), Naıdjel Benn (Ulybrıtanııa)
Women’s Modern sanaty: Naoko Fýdzıoka (Japonııa), Djekı Nava (Meksıka)
Gennadıı Golovkınniń bul mártebege ıe bolýy onyń biregeı sporttyq kórsetkishterine negizdelgen. Áýesqoı boksta ol 350 jekpe-jektiń 345-inde jeńiske jetken. Sonymen qatar uzaq jyldar boıy Qazaqstan quramasynyń kóshbasshysy bolyp, el namysyn álemdik deńgeıdegi eń iri jarystarda abyroımen qorǵady.
Kásipqoı boksqa aýysqannan keıin Golovkın XXI ǵasyrdaǵy orta salmaqtaǵy ústemdik etetin chempıondardyń birine aınaldy. Onyń enshisinde 45 jekpe-jek pen 42 jeńis bar. Onyń 37-si nokaýtpen aıaqtalǵan. Sporttyq mansabynda ol WBA, WBC, IBF jáne IBO nusqalary boıynsha álem chempıony atanyp, The Ring jýrnalynyń bedeldi belbeýin ıelendi. Sondaı-aq uzaq ýaqyt boıy salmaq dárejesine qaramastan úzdik boksshylardyń álemdik reıtınginde (Pound-for-Pound) kósh bastady.
HBO telearnasymen jasalǵan kelisimshart qazaqstandyq boksshyny qysqa merzimde álemdik bokstyń basty juldyzdarynyń birine aınaldyrdy. Onyń kórermenge tartymdy stıli men joıqyn soqqysy álemdik arenadaǵy eń tanymal sportshylardyń qataryna qosty. Gennadıı Golovkınniń jekpe-jekteri turaqty túrde mıllıondaǵan kórermendi ekran aldyna jınady.
Golovkın orta salmaq tarıhyndaǵy birqatar rekordtardyń ıesi. Onyń toǵyz jyl boıy jalǵasqan qatarynan 23 nokaýttyq jeńisi osy dıvızıon tarıhyndaǵy eń uzaq serııa bolyp sanalady. Sonymen qatar onyń qorjynynda álem chempıony tıtýldaryn 21 ret sátti qorǵaý kórsetkishi bar. Al 90 paıyzdan asqan merziminen buryn aıaqtalǵan jeńister kórsetkishi álem chempıondary arasyndaǵy eń joǵary nátıjelerdiń biri retinde Gınnestiń rekordtar kitabyna engizilgen.
Búginde Gennadıı Golovkın Qazaqstannyń sporttyq múddesin tek rıngte ǵana emes, halyqaralyq sporttyq basqarý deńgeıinde de tanytyp keledi. Ol Qazaqstan Ulttyq Olımpıadalyq komıtetin basqarady, sondaı-aq World Boxing uıymynyń prezıdenti qyzmetin atqarady. Osylaısha ol halyqaralyq sport federatsııasynyń prezıdenti bolyp saılanǵan Qazaqstannyń alǵashqy ókili atandy.
Aıta keteıik, Halyqaralyq boks dańqy zaly 1989 jyly Ed Brofı bastamasymen Kanastota qalasynda qurylǵan. Bul uıym boks sportyna eleýli úles qosqan tulǵalardy máńgi este qaldyrýǵa arnalǵan álemdegi basty ınstıtýt sanalady. Uıym kásibı bokstyń tarıhyn saqtaý jáne dáripteýmen aınalysady. Qazirgi tańda Halyqaralyq boks dańqy zalynyń quramynda 300-den astam múshesi bar.
Osyǵan dein jazǵanymyzdaı, Golovkındi Dańq zalyna qabyldaý aldynda amerıkalyq jankúıerler erekshe qurmetpen qarsy aldy.
