Muhamedıuly saǵat 18:00-den keıingi jumys týraly: Men otyra beremin
ASTANA. QazAqparat - QR Mádenıet jáne sport mınıstri Arystanbek Muhamedıuly saǵat 18:00-den keıin de jumysta otyra beretinin moıyndady, dep habarlaıdy QazAqparat tilshisi.
«Saǵat alty deısiz. Qazir saǵat altydan keıin jumysta otyramyn dep aıtsam, tártip buzǵan bolyp shyǵamyn. Shynymdy aıtaıyn, óz basym jumys istegendi jaqsy kóremin. Negizinen eń tıimdi ýaqyt - keshki altydan keıingi ýaqyt. Al oǵan deıin kúndiz kúni boıy qońyraýǵa jaýap berip, jınalystan jınalysta júremiz. Al altydan keıin hattardyń bárin de asyqpaı oqýǵa múmkinshilik bolady. Bir oılaryń bolsa, áriptestermen bólisip otyrǵan... Endi óner nemese sport salasy bolsyn, óte tıimdi ýaqyt - emin-erkin otyrǵan shaq. Ásirese, senbi kúni túske deıin óte tıimdi», - dedi ol.
Arystanbek Muhamedıuly keshki saǵat altydan keıin jumysta otyratynyn moıyndady.
«Myna qyzmetkerler (zalda otyrǵan Mádenıet jáne sport mınıstrliginiń qyzmekterlerine nusqap) keshki alty jarymnan keıin kompıýterdi óshirip ketip qalady. Al men otyra beremin. Negizinen aıtar edim: eger jumys istep jatqan azamat kóńili qalap tursa, biz ony nege shekteýimiz kerek. Mysaly, shyny kerek, mınıstrlikke jetekshi maman bolyp kelgem. Táýlik boıy jumys isteıtinmin. Árıne, alǵa qaraı jyljyp, ózimdi kórsetkim keldi. Jańadan bir ıdeıalardy tapqym keldi. Barlyǵyn úıde atqarý múmkinshiligi joq qoı. Mysaly, úıge barsań, onsha jumys isteı almaısyń - qonaq keledi degendeı... Al jumysta emin-erkin jumys isteısiń», - dedi Arystanbek Muhamedıuly.
Eske sala ketsek, budan buryn QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Alık Shpekbaev elimizde qyzmetkerleri normadan artyq jumys istegen memlekettik organdardyń basshylary jazalanatyn málim etken edi.
