Muhamedıuly ózine jala japqan rejısserge qatysty aryzdy qaıtaryp aldy
Bul týraly «QazAqparat» agenttigine Arystanbek Muhamedıulynyń zańgeri Eskendir Álimbaev habarlady. Mınıstrdiń quqyǵyn qorǵaǵan aıtýynsha, atalmysh qylmystyq is Talǵat Jánibekovtiń málimdemesinen keıin qozǵalǵan. Onyń nátıjesi boıynsha, Mádenıet mınıstrliginiń laýazymdy qyzmetkerleri tarapynan eshqandaı zańbuzýshylyqtar anyqtalmaǵan.
«Talǵat Jánibekovtyń málimdemesi boıynsha, tergeý jumystary júrgizildi, onyń aıtqan derekteri tekserildi. Degenmen mınıstr tarapynan, mınıstrliktiń qyzmetkerleri tarapynan eshqandaı zańbuzýshylyqtar bolmaǵany anyqtaldy», - dedi E.Álimbaev.
«Aldyn ala tergeý barysynda, ıaǵnı betpe-bet sóılesý kezinde, rejısser ózi aıtqan sózderden bas tartty. Ol onyń sózin durys túsinbedi, naqty eshteńe meńzemegenin aıtyp aqtaldy. A.Muhamedıuly úshin qarajat alý týraly áńgime eshkimmen júrgizbegen, bopsalaý, «jarna» tóleý jáne bıýdjet qarajatyn urlaý jónindegi málimdemeni túsindire almady, sebebi ondaı málimdemelerdi ol jasamaǵan», - dedi mınıstrdiń zańgeri.
Onyń aıtýynsha, mınıstr A.Muhamedıulynyń ar-namysyn, bedelin qorǵaý úshin azamattyq sotqa bergen shaǵymy aryzdanýshynyń ótinishi boıynsha qaraýsyz qalady.
«Biz T.Jánibekov tarapynan resmı túrde keshirim suraýdy kútken edik. Betpe-bet kezdesýde, ol óziniń buryn aıtqan málimdemelerinen tolyq bas tartqannan keıin, biz onyń resmı ókilderi arqyly onyń bul sózderin erikti túrde kópshilik aldynda joqqa shyǵarýyn suradyq. Alaıda T.Jánibekov tarapynan osyǵan baılanysty qandaıda bir sharalar qoljasalǵan joq», - dep túıdi sózin E.Álimbaev.
Eske sala keteıik, 12 shilde kúni, rejısser Talǵat Jánibekov QR Mádenıet jáne aqparat mınıstri Arystanbek Muhamedıulyn buqara aldynda qarajat bopsalady dep aıyptaǵan bolatyn. Osydan soń, mınıstr óziniń ar-namysyn qorǵaý maqsatynda zańger jaldap, rejısserdi sotqa bergen bolatyn.
