Muhamedıuly «Qurmet» jáne «Parasat» ordeninen, qaıratker ataǵynan aıyrylady
ASTANA. QazAqparat – Ulttyq mýzeıdiń burynǵy dırektory Arystanbek Muhamedıuly osyǵan deıin alǵan memlekettik nagradalary men berilgen ataq-dárejelerin keri qaıtarady, dep habarlaıdy QazAqparat tilshisi.
«Prezıdentke Arystanbek Muhamedıulyna berilgen «QR Eńbegi sińgen qaıratkeri» ataǵy, sonymen qatar «Qurmet» jáne «Parasat» ordeninen aıyrý týraly usynys berilsin», - dedi úkimdi oqyǵan sýdıa Baǵlan Ydyrysov.
Ulttyq mýzeıdiń burynǵy basshysy ómir boıy memlekettik qyzmette eńbek etý quqyǵynan da aıryldy.
Sondaı-aq, úkimde Arystanbek Muhamedıulynyń dúnıe-múlki tárkilenbeıtini aıtylǵan.
Buǵan deıin habarlaǵanymyzdaı, Arystanbek Muhamedıuly 8 jylǵa sottaldy.
«Arystanbek Muhamedıuly QR Qylmystyq kodekstiń 28-baby 3-bóligi jáne 189-bóligi 4-tarmaǵy 2-tarmaǵy boıynsha quqyq buzýshylyq jasaǵany úshin kináli dep tanylsyn. 8 jylǵa bas bostandyǵynan aıyrý jazasy taǵaıyndalsyn», - dedi sýdıa Baǵlan Ydyrysov.
Odan bólek, sýdıa Arystanbek Muhamedıulynyń sybaılastaryna da úkim shyǵardy.
