Muhamedıuly Qazaqstannyń kıeli jerleriniń kartasyn jasaqtaýdy tapsyrdy
Bul tapsyrma Elbasynyń «Bolashaqqa baǵdar: rýhanı jańǵyrý» atty maqalasynda aıtylǵan negizgi ıdeıalardy júzege asyrýǵa baǵyttalyp otyr.
«Memleket basshysy «Qazaqstanyń qasıetti rýhanı qundylyqtary» nemese «Qazaqstannyń kıeli jerleriniń geografııasy» jobasyn qolǵa alýdy tapsyrdy. Árbir halyqtyń, árbir órkenıettiń jalpyulttyq sıpatqa ıe qasıetti jerleri bar. Bul - rýhanı dástúrdiń negizi. Qazaqstan úshin bul óte mańyzdy, sebebi baı tarıhqa ıe, kıeli de keń-baıtaq jerge ıe Qazaqstan esh qıyndyqtarǵa, surapyl zamandarǵa qaramastan, atalmysh kıeli jerlerdiń geografııasymen baılanysty úzgen emes. Osy turǵyda, Prezıdent Ulytaý tórindegi jádigerler keshenin, Qoja Ahmet ıAsaýı mavzoleıin, Tarazdyń ejelgi eskertkishterin, Beket ata kesenesin, Altaıdaǵy kóne qorymdar men Jetisýdyń kıeli mekenderin jáne basqa da jerlerdi ózara sabaqtastyrýdy tapsyrdy. Osy jerlerdiń barlyǵy - bizdiń ulttyq biregeıligimizdiń keregesi», - dep atap ótti mınıstr búgin vedomstvonyń alqa májilisinde.
Onyń atap kórsetkenindeı, týrızm mańyzdylyǵy jaǵynan energetıka, agroónerkásiptik keshen, saýda, kólik, ındýstrıalandyrý salalarymen bir deńgeıde tur. Sol sebepti osy baǵyttaǵy taqyryptar jeke-jeke taldanatyn bolady.
«Sondyqtan, osy oraıda, Mádenıet ınstıtýty men Týrızm komıtetine, múddeli taraptarmen birge bir aı ishinde Qazaqstannyń kıeli oryndarynyń kartasyn jasaqtaýdy tapsyramyn. Sonymen qatar olardy keńinen zerttep, ary qaraı nasıhattaýǵa baǵyttalǵan jospar jasaqtalýy tıis. Óz kezeginde Mádenıet departamenti Discovery (Dıskaverı), National Geographic (Neshnl Djeografık) telearnalarymen birlesip, Qazaqstan týraly ǵylymı-tanymal fılmder serııasyn shyǵarý máselesin tııanaqtaýy qajet», - dedi mınıstr.
