Muhamedıuly IBU prezıdentimen bıatlon sportyn damytý máselelerin talqylady

ASTANA. QazAqparat - Qazaqstan Respýblıkasy Mádenıet jáne sport mınıstri Arystanbek Muhamedıuly jáne Bıatlonısterdiń halyqaralyq odaǵynyń (IBU) prezıdenti Anders Besseberg Almatydaǵy ekijaqty kezdesý barysynda elimizde bıatlonnyń damý bolashaǵy men salanyń ózekti máselelerin talqylady, dep habarlaıdy QazAqparat.

«Bıatlonıster halyqaralyq odaǵynyń turaqty basshysy jáne iri kásibı tájirıbesi bar sport menedjeri retinde siz bıatlonnyń barsha álemdegi damýyna eleýli úles qosýdasyz. Qazaqstan qysqy sport túrleriniń damýyna, sonyń ishinde qazaqstandyqtar arasynda bıatlonnyń tanymaldyǵyn arttyrýǵa erekshe mán beredi», - dedi mınıstr.

Sonymen qatar ol Qazaqstandaǵy bıatlonnyń damýy men ózekti máselelerin sheshýde halyqaralyq uıymmen jan-jaqty yntymaqtastyqqa daıyndyǵyn rastady.

Óz kezeginde Anders Besseberg Búkilálemdik stýdentter oıyndarynyń daıyndyq deńgeıine rızashylyǵyn bildirdi.

«Qazaqstanǵa kórsetip jatqan qonaqjaılyǵy men Ýnıversıadany uıymdastyrýdaǵy joǵary daıyndyq deńgeıi úshin alǵys bildiremin. Stýdenttik sport joǵary kórsetkishter sportynyń damýynda aıryqsha mańyzdy oryn alady, al sizdiń elińiz búgingi tańda dúnıejúzine álemdik sporttaǵy jańa belesterdi baǵyndyrýǵa umtylysyn kórsetip jatyr», - dep pikirin bildirdi halyqaralyq maman.

Mınıstrliktiń baspasóz qyzmetinen málim etkendeı, áńgime barysynda qazaqstandyq vedomstvonyń basshysy men IBU jetekshisi ortaq bastamalar boıynsha birqatar usynystardy, halyqaralyq odaqtyń túrli baǵdarlamalaryn, sonyń ishinde balalar-jasóspirimder sporty, mamandardy daıarlaý, sapaly jattyǵý úrdisterin uıymdastyrý jáne t.b. salalardaǵy baǵdarlamalaryn júzege asyrý múmkindigin talqylady.

Aıta keteıik, 31 qańtar kúni Almatyda ótip jatqan Ýnıversıada oıyndary barysynda qazaqstandyq bıatlonshy qyzdar altyn men kúmiske medal ıelendi. Al otandyq erler quramasy 20 km qashyqtyqqa baǵyttalǵan jeke jarysta birde-bir júldege qol jetkize almady.