Muhamedıuly: 7 baǵytty qamtıtyn ekspedıtsııa daıyndaýdamyz

ASTANA. QazAqparat - 7 baǵytqa arnalǵan búkil qazaqstandyq ekspedıtsııaǵa daıyndyq júrgizilýde. Bul týraly búgin Aqordada ótken Rýhanı jańǵyrý jónindegi ulttyq komıssııa otyrysynan keıin BAQ ókilderine suhbat bergen QR Mádenıet jáne sport mınıstri Arystanbek Muhamedıuly málim etti, dep habarlaıdy QazAqparat.

«Qoǵamdyq sanany jańǵyrtý baǵdarlamasyn tabysty júzege asyrar bolsaq, Elbasymyz aıtqandaı Qazaqstannyń bolashaǵy múldem basqasha bolady. Óıtkeni, ár halyqty onyń rýhanı baılyǵy men sana-sezimi qalyptastyrady. Al bul baǵdarlama bizdiń sana-senimimizdiń joǵarylaýyna, óz qundylyqtarymyzdy saqtaýǵa septigin tıgizip, dúnıejúzinde qazaq kim degende «men» dep maqtanyshpen aıtatyndaı jaǵdaıǵa jetkizýi tıis», - dedi mınıstr.

Osy rette Arystanbek Muhamedıuly qazirdiń ózinde mádenıet, sport, óner syndy salalarda zor jetistikterimiz bar ekendigin basa aıtty.

«Dımash Qudaıbergenuly syndy jas ánshilerimiz búkil dúnıege tanymal. Máselen, 300 qytaı jınalyp alyp, qazaq tilinde «Daıdıdaý» ánin oryndady. Munyń barlyǵy úlken maqtanysh. Biz (ózimizdiń azamattarymyzǵa) qazaq tilin úırenińder deımiz. Al basqa ulttyq ókilderi osyndaı jastarymyzdyń arqasynda qazaq tilin ózderi-aq úırenip jatyr»,- dep atap ótti ol.

Onyń aıtýynsha, «Qazaqstannyń kıeli jerleriniń geografııasy» jobasy aıasynda elimizdiń óńirlerinde jastar elimizdiń tarıhı aımaqtaryna ekspedıtsııalar uıymdastyrý ústinde. Al Mádenıet jáne sport mınıstrligi bolsa jaz aıynda 7 baǵytqa arnalǵan búkil qazaqstandyq ekspedıtsııa daıyndaýda.