Muhamed Álı aýrýhanadan jaqynda shyǵady
ASTANA. QazAqparat - Ótken jeksenbide ókpesi qabynyp aýrýhanaǵa túsken Muhamed Álıdiń densaýlyǵy jaqsardy, dep habarlady sportshynyń baspasóz hatshysy Bob Gannell. Bul týraly VVS agenttigi jazdy.
Dárigerlerdiń boljamy boıynsha, Muhamed Álı aldaǵy kúnderi aýrýhanadan shyǵady. Bob Gannell boksshy januıasynyń ótinishi boıynsha, onyń qaı aýrýhanada jatqanyn jáne densaýlyǵy týraly naqty aqparattar berýden bas tartty.
1984 jyly, sporttyq karerasyn aıaqtaǵannan soń 3 jyldan keıin Muhamed Álıden Parkınson aýrýy anyqtalǵan. Sońǵy ýaqytta boksshy qoǵam aldynda kóp kórinbeıdi. Tek, ústimizdegi jyldyń qyrkúıek aıynda ol óz atymen atalatyn gýmanıtarlyq syılyqty tabys etý saltanatty sharasyna qatysty.
