Muhambetov pen Isekeshev Qostanaı oblysynyń aýyl sharýashylyǵy jármeńkesin aralady

 ASTANA. QazAqparat - Elordada Qostanaı oblysynyń aýyl sharýashylyǵy jármeńkesi ótýde. Búgin Qostanaı oblysynyń ákimi Arhımed Muhambetov pen Astana ákimi Áset Isekeshev jármeńkeni aralap shyqty, dep habarlaıdy QazAqparat.

«Qazaqstan» sport kesheni janyndaǵy alańda ótip jatqan jármeńkege Qostanaı oblysynyń 11 aýdany men 3 qalasynan kelgen 50 iri kásiporyn qatysýda. Elordalyqtardyń satyp alýyna jalpy salmaǵy 650 tonnany quraıtyn ónimniń 100-den asa túri usynylǵan. Onyń ishinde 33 tonna ettiń barlyq túrleri, 90 tonna sút ónimderi, 59 tonna shujyq buıymdary jáne et jartylaı fabrıkattary, 52 tonna makaron ónimderi, 57 tonna nan jáne kondıterlik ónimder,  200 myń dana jumyrtqa, 93 tonna un jáne basqa ónimder bar.
 

Jármeńkedegi aýylsharýashylyq ónimderi Astana qalasynyń naryǵyndaǵy ortasha baǵalardan 30-40 paıyzǵa tómen.

Aıta keterligi, osy kúnderi elordada «EKSPO-2017» halyqaralyq mamandandyrylǵan kórmesine arnalǵan Qostanaı oblysynyń kúnderi ótýde. Búgin  «Qazanat» atshabarynda «Shyrqar ánim týǵan ólkem - Qostanaı!» kontsertinde Qostanaı oblysyndaǵy halyq ánderin úzdik oryndaýshylar, sondaı-aq, Elýbaı Ómirzaqov atyndaǵy oblystyq fılarmonııasy shyǵarmashylyq ujymdarynyń ónerin tamashalaýǵa bolady.   Sonymen qatar elordadaǵy Q.Qýanyshbaev atyndaǵy qazaq mýzykalyq-drama teatrynda qostanaılyq oblystyq qazaq drama teatry Ybyraı Altynsarınge arnalǵan «Dala shamshyraǵy» spektaklin qoıady.
 

7 tamyzda M.Gorkıı atyndaǵy orys teatrynda qostanaılyq ártister Ahmet Baıtursynov pen onyń jubaıy Bádrısafaǵa arnalǵan «Lıýbov ı smert Aq kelin» spektaklin elordalyqtarǵa usynady.