Muhambet Kópeev Kýáıt memleketi Halyq Assambleıasynyń depýtaty, «Kýáıt-Qazaqstan» dostyq tobynyń tóraǵasy Ýalıd Mýsaıd ál-Tabtabaı bastaǵan parlamenttik delegatsııamen kezdesti

Kezdesý barysynda M.Kópeev bul sapardyń parlamentaralyq baılanystardy odan ári ilgeriletýdegi jáne memleketaralyq qatynastardy damytýdaǵy halyq dıplomatııasynyń mańyzyn atap ótti.

Senat qyzmeti men qurylymyn tanystyra kelip, tóraǵa orynbasary memlekettik organdar júıesindegi Parlamenttiń róli týraly áńgimeledi. Qazaqstannyń syrtqy saıasatyna qatysty M.Kópeev bizdiń elimizdiń halyqaralyq qurylymdarǵa belsene aralasyp kele jatqany týraly aıta kelip, jahandyq órkenıetaralyq jáne dinaralyq únqatysýdy damytý, toleranttyq jáne tózimdilikti nyǵaıtýdaǵy Astananyń bastamalaryna toqtaldy.

Ý.M. ál-Tabtabaı óz kezeginde eki memlekettiń zań shyǵarýshy organdary arasyndaǵy yntymaqtastyqty belsendilendirýde osy sapardyń mańyzdy qadam bolatynyn atap ótti. Onyń pikirinshe, zań shyǵarý salasyndaǵy tájirıbe almasý jáne keńesýler parlamentaralyq baılanystardy jańa deńgeıge kóteretin bolady.

Kýáıt Halyq Assambleıasynyń depýtaty toleranttyq jáne dinaralyq kelisim salasyndaǵy bizdiń elimizdiń jetistikterin joǵary baǵalady jáne arab álemindegi Qazaqstannyń erekshe orny men Ortalyq Azııa óńirindegi jetekshi rólin atap ótti.

Ý.M. ál-Tabtabaı Qazaqstan aldaǵy jyly Islam Konferentsııasy Uıymy tóraǵasynyń laýazymynda mańyzdy mıssııany tabysty atqaratyn bolady dedi.