Múgedektikti rásimdeý ýaqyty qysqarady
ASTANA. KAZINFORM — Qazaqstanda múgedektikti belgileý kezinde qyzmet kórsetý merzimin qysqartý úshin jańa tsıfrlyq sheshimder engizilip jatyr. Bul týraly Eńbek jáne halyqty áleýmettik qorǵaý vıtse-mınıstri Bahtııar Jazyqpaev málimdedi.
Onyń aıtýynsha, bul baǵytta medıtsınalyq derekter negizinde sarapshylarǵa usynymdar qalyptastyratyn jasandy ıntellekt modeli iske qosylǵan.
— Medıtsınalyq derekter men qujattar negizinde sarapshylarǵa usynymdar beretin júıe engizildi. Bul rette túpkilikti sheshimdi maman qabyldaıdy. Júıe iske qosylǵan sátten bastap 24 myńnan astam ótinim óńdeldi, — dedi ol.
Sonymen qatar qyzmet alý protsesin jeńildetý úshin elektrondyq kezek júıesi engizilip jatyr.
— Aqmola oblysynda pılottyq joba aıasynda 1,6 myńǵa jýyq ótinim berildi. Onyń ishinde 1,1 myńnan astam azamat kýálandyrý rásiminen ótýge jazyldy. Bul kútý ýaqytyn qysqartyp, qyzmet alý úderisin jeńildetti, — dedi Bahtııar Jazyqpaev.
Vıtse-mınıstrdiń sózinshe, aldaǵy ýaqytta bul baǵyttaǵy jumystar jalǵasady.
— Elektrondyq kezekti keńeıtý, jasandy ıntellekt modelderin damytý jáne olardy densaýlyq saqtaý júıelerimen biriktirý josparlanyp otyr, — dedi ol.
Budan bólek, áleýmettik qyzmetter portalyn damytý jumystary da qatar júrgizilip jatyr.
Portal arqyly azamattar ońaltý quraldaryna, shıpajaıda em alýǵa jáne jeke kómekshi qyzmetterine qol jetkize alady.
Aıta keteıik, elimizde ataýly áleýmettik kómek alýshylar sany azaıyp keledi.