Múgedektikti rásimdeý: qandaı qujattar qajet jáne qandaı talaptar bar
ÓSKEMEN. KAZINFORM — Shyǵys Qazaqtan oblysynda mamandar múgedektikti belgileý tártibin túsindirip berdi.
Múgedektikti belgileý, eńbekke qabilettilikten aıyrylý dárejesin anyqtaý jáne qajetti áleýmettik qorǵaý sharalaryn belgileý boıynsha memlekettik qyzmet tegin kórsetiledi. Atalǵan qyzmetti alý tártibi týraly ShQO Óńirlik kommýnıkatsııalar qyzmetinde ótken brıfıngte Halyqty áleýmettik qorǵaý salasyndaǵy retteý jáne baqylaý komıteti oblystyq departamentiniń ókilderi aıtyp berdi.
— Medıtsınalyq-áleýmettik saraptama densaýlyq saqtaý salasy uıymy bergen joldama negizinde júrgiziledi. Joldama patsıent tolyq tekserýden ótip, em qabyldaǵannan keıin rásimdeledi. Kýálandyrý birneshe formatta júzege asyrylady. Azamattyń jeke qatysýymen, úı jaǵdaıynda, medıtsınalyq uıymdarda, syrttaı jáne proaktıvti túrde. Búgingi tańda oblysta múgedektikti belgileý boıynsha memlekettik qyzmetti 3 445 azamat alǵan, — deıdi departament basshysynyń mindetin atqarýshy Natalıa Lıtke.
Óńirde azamattardy qabyldaý aldyn ala jazylýsyz, saǵat 08:00–den 12:00–ge deıin kezek tártibimen júrgiziledi. Tústen keıin mamandar qujattardy qarap, syrttaı kýálandyrý jumystaryn jáne saraptamalyq sharalardy júzege asyrady.
Medıtsınalyq qujattardyń durystyǵy máselesine de erekshe nazar aýdarylǵan. Jyl basynan beri elde jalǵan málimet usyný jáne medıtsınalyq qujattardy bekitilgen talapqa saı rásimdemeýge baılanysty 150-den astam zańbuzýshylyq anyqtalǵan.
— Saraptama qorytyndysy tek rastalǵan medıtsınalyq málimetter negizinde júzege asyrylady. Al jalǵan aqparat pen qujat usyný zań aldyndaǵy jaýapkershilikke ákep soǵýy múmkin, — dep eskertti N.Lıtke.
Eske salsaq, osyǵan deıin júktiligi úzilip, múgedektik alǵan áıel aýrýhanadan 5 mln teńge óndirip alǵany habarlanǵan.
