Múgedektikti belgileýge qatysty 113 myńnan astam ótinim syrttaı formatta qaraldy
ASTANA. KAZINFORM – 2025 jyly Qazaqstanda medıtsınalyq-áleýmettik saraptama júrgizý aıasynda múgedektikti belgileýge arnalǵan 113,1 myń ótinim syrttaı formatta qaraldy. Bul el boıynsha kýálandyrýdan ótken múgedektigi bar adamdardyń jalpy sanynyń 42,5 paıyzy.
Eńbek jáne halyqty áleýmettik qorǵaý mınıstrligi málimetinshe, syrttaı proaktıvti kýálandyrý birqatar nozologııalyq nysandar boıynsha qoldanylady. Olardyń qataryna onkologııalyq aýrýlar, barlyq lokalızatsııadaǵy týberkýlez, týa bitken jáne júre paıda bolǵan anatomııalyq damý kemistikteri, psıhıkalyq aýrýlar, balalardaǵy birinshi tıpti qant dıabeti, balalardaǵy mýkopolısaharıdoz, sondaı-aq aǵza transplantatsııasynan keıingi jaǵdaılar kiredi.
2025 jyly nozologııalyq nysandar tizbesi edáýir keńeıtildi. Oǵan shynaıy gıdrotsefalııa, bir nemese birneshe aıaq-qoldyń turaqty aıqyn saldanýy nemese tereń parezderi sııaqty aýrýlar engizildi.
Osylaısha, qazirgi tańda syrttaı formattaǵy kýálandyrý 50-den astam nozologııalyq nysan boıynsha júrgiziledi.
Buǵan deıin habarlanǵandaı, Ulttyq qoǵamdyq senim keńesiniń VI otyrysynda Memleket basshysy erekshe qajettilikteri bar adamdar úshin barynsha qolaıly jaǵdaı jasaýdy, olardyń ınstantsııalar men qaǵazbastylyq boıynsha júrýin, sondaı-aq kórsetiletin qyzmetti berýshilerdiń qyzmet alýshylarmen baılanysyn boldyrmaýdy tapsyrdy.
Atalǵan tapsyrmany oryndaý maqsatynda Qazaqstanda medıtsınalyq-áleýmettik saraptamanyń syrttaı formaty engizildi. Bul jaǵdaıda ótinish berýshige tek tirkelgen jeri boıynsha medıtsınalyq uıymǵa júginip, qajetti tekserýden ótý jetkilikti.
Qujattardy joldaýdan bastap saraptamalyq sheshim shyǵarýǵa deıingi barlyq keıingi kezeńder azamattyń jeke qatysýynsyz, aqparattyq júıelerdiń ıntegratsııasy arqyly júzege asyrylady. №031/ý nysanyndaǵy medıtsınalyq qujattar medıtsınalyq uıymdardan MÁS bólimshelerine elektrondyq formatta joldanady.
Syrttaı kýálandyrýǵa kóshý:
- ákimshilik jáne bıýrokratııalyq kedergilerdi joıady;
- MÁS saraptamalyq sheshimderiniń ashyqtyǵyn qamtamasyz etedi;
- múgedektikti belgileý jáne múgedektigi bar adamdardy áleýmettik qorǵaý sharalaryn anyqtaý boıynsha qyzmetterdi úıden shyqpaı-aq alýǵa múmkindik beredi;
- kórsetiletin qyzmetti alýshynyń kórsetiletin qyzmetti berýshimen tikeleı baılanysyn boldyrmaıdy, sol arqyly sybaılas jemqorlyq táýekelderin azaıtady.
Aıta keteıik, 2026 jyldan múgedektigi bar jandarǵa járdemaqy 10 paıyzǵa ósedi.
Jyl basynan beri múgedektik tobyn belgileý úshin medıtsınalyq-áleýmettik saraptama júrgizýdiń syrttaı formaty boıynsha pılottyq jobany iske asyrý sheńberinde Qazaqstannyń barlyq óńirlerinen 99,6 myń ótinim qaraldy. Búginde syrttaı formatta kýálandyrý 30 nozologııalyq nysan boıynsha júrgiziledi.
