Múgedektikti belgileýdiń jańa tásili: SQO-da qyzmetterdiń 57%-y syrttaı kórsetildi

SQO halyqty áleýmettik qorǵaý salasyndaǵy retteý jáne baqylaý departamentiniń málimetinshe, osy jyldyń alǵashqy jeti aıynda 762 azamatqa múgedektik alǵash ret belgilendi.

Mamandardyń aıtýynsha, múgedektik kóbine qaterli isikterge, ınsýlt saldaryna, kóz aýrýlaryna, psıhıkalyq jáne minez-qulyq buzylystaryna baılanysty beriledi.

Qazirgi ýaqytta medıtsınalyq-áleýmettik saraptamadan ótýdiń eki formaty qoldanylady. Olar - kúndizgi jáne syrttaı proaktıvti kýálandyrý.

Kúndizgi kýálandyrý tek departamentte ǵana emes, aýdandyq aýrýhanalardyń emhanalarynda, qylmystyq-atqarý júıesi mekemelerinde, medıtsınalyq-áleýmettik uıymdarda júrgiziledi. Sonymen qatar júrip-turýy qıyn azamattarǵa turǵylyqty jeri boıynsha kóshpeli formatta qyzmet kórsetý qarastyrylǵan.

- Syrttaı proaktıvti kýálandyrý Memleket basshysynyń tapsyrmasy boıynsha múgedektikti belgileý rásimin jeńildetý maqsatynda engizilgen. Bul jaǵdaıda azamat medıtsınalyq uıymǵa ǵana júginedi jáne medıtsınalyq-áleýmettik saraptama bólimine barýdyń qajeti joq.

Bul tásil ásirese oblystyń shalǵaı aýdandarynda turatyn turǵyndar úshin mańyzdy. Azamat qajetti medıtsınalyq tekserýden ótkennen keıin qujattar elektrondy formatta saraptamaǵa jiberiledi, - deıdi mamandar.

Búginde syrttaı kýálandyrýǵa 23 nozologııa engizilgen. Bıyl osy qyzmet túrin 1918 adam paıdalanǵan. Bul múgedektikti belgileý boıynsha kórsetilgen qyzmetterdiń jalpy sanynyń - 57%.

- Syrttaı medıtsınalyq-áleýmettik saraptama barysynda sarapshylar azamattyń jeke basyna qatysty aqparatty kórmeıdi, tek medıtsınalyq derektermen jumys isteıdi. Mundaı tásil qyzmet kórsetý protsesiniń ashyqtyǵyn qamtamasyz etip, qyzmet kórsetýshi men qyzmet alýshy arasyndaǵy tikeleı baılanysty boldyrmaıdy. Bul óz kezeginde sybaılas jemqorlyq táýekelderin azaıtýǵa múmkindik beredi, - deıdi Gúlbaqyt Manabaeva.

Buǵan deıin Jambyl oblysynda alǵash ret múgedektik belgilengen balalar sany 23%-ǵa óskenin jazǵan edik.