Múgedektikti anyqtaý kezinde qandaı qujattardy qaıta tapsyrýdyń qajeti joq
ASTANA. KAZINFORM — Elordada múgedektikti anyqtaý jáne áleýmettik qoldaý alý kezinde memlekettik júıelerde bar keı qujattardy qaıta tapsyrý qajet bolmaıdy. Bul týraly Astana qalasy boıynsha Halyqty áleýmettik qorǵaý salasyndaǵy retteý jáne baqylaý komıteti departamenti basshysynyń orynbasary Lázzat Sartymbetova aıtty.
Onyń sózinshe, medıtsınalyq uıymdar, medıtsınalyq-áleýmettik saraptama jáne áleýmettik qorǵaý organdary azamatqa qajetti málimetterdi ózara almasady.
— Azamattar memlekette bar qujattardy qaıta usynýǵa mindetti emes. Medıtsınalyq tekserýler, statsıonardan alynǵan úzindi kóshirmeler jáne dıagnostıkalyq zertteýlerdiń nátıjeleri týraly málimetter vedomstvolar arasynda avtomatty túrde berilýi múmkin. Medıtsınalyq uıym, medıtsınalyq-áleýmettik saraptama jáne áleýmettik qorǵaý organdary ózara baılanysta jumys isteıdi, — dedi spıker.
Lázzat Sartymbetovanyń sózinshe, bul tásil, ásirese múgedektigi bar balany tárbıelep otyrǵan otbasylar úshin mańyzdy. Buǵan deıin ata-analar ártúrli áleýmettik qoldaý sharalaryn alý úshin belgili bir qujattar toptamasyn birneshe ret jınaýǵa májbúr bolatyn.
— Jańa tártip boıynsha memlekettik organdarda bar qajetti málimetter tıisti mekemelerge avtomatty túrde beriledi. Sonyń nátıjesinde azamattyń bir qujatty qaıta-qaıta jınap, ár mekemege jeke júginý qajettiligi azaıady, — dedi ol.
Aıta keteıik, vedomstvo málimetinshe, 2026 jylǵy 25 tamyzdaǵy málimet boıynsha, Astanada 43 403 múgedektigi bar adam turady. Onyń 5 346-sy — birinshi toptaǵy, 11 733-i — ekinshi toptaǵy, 13 339-y — úshinshi toptaǵy múgedektigi bar azamattar. Sondaı-aq elordada 18 jasqa deıingi múgedektigi bar 12 985 bala bar.
Buǵan deıin Astanada múgedektikti anyqtaý protsesi qalaı júrgiziletini jóninde jazdyq.
