Múgedektik týraly qorytyndyǵa qalaı shaǵymdanýǵa bolady
ASTANA. KAZINFORM – Eńbek jáne halyqty áleýmettik qorǵaý mınıstrligi medıtsınalyq-áleýmettik saraptama qorytyndylaryna shaǵymdaný tártibin túsindiredi.
Eger azamat múgedektik tobyna, onyń merzimi men sebebine, sondaı-aq eńbekke qabilettiliginen aıyrylý dárejesine qatysty qabyldanǵan sheshimmen kelispese, saraptamalyq qorytyndyny qaıta qaraý týraly ótinish berýge quqyly. Bul quqyqty onyń zańdy ókili de paıdalana alady.
Ol úshin saraptamalyq qorytyndy alynǵan kúnnen bastap úsh aıdan keshiktirmeı QR EHÁQM Halyqty áleýmettik qorǵaý salasyndaǵy retteý jáne baqylaý komıtetiniń aýmaqtyq departamentine shaǵym berý qajet. Shaǵymdy qaǵaz túrinde nemese e-Otinish platformasy arqyly elektrondyq formatta joldaýǵa bolady.
Qorytyndyny qaıta qaraý tártibi bastapqy kýálandyrýdyń qalaı júrgizilgenine baılanysty. Eger azamat tikeleı júrgizilgen saraptama nátıjesine shaǵymdansa, ony MÁS ádisnama jáne baqylaý bólimi qaıta qaraıdy. Mamandar medıtsınalyq qujattardy zerdelep, azamatty tekseredi. Dıagnozdy jáne aǵza fýnktsııalarynyń buzylý dárejesin naqtylaý qajet bolǵan jaǵdaıda kardıolog, onkolog, oftalmolog, pedıatr jáne psıholog sııaqty beıindi mamandar tartylady.
Eger azamat syrttaı, proaktıvti formatta júrgizilgen kýálandyrý nátıjesimen kelispese, shaǵymyn turaqty tirkelgen jeri boıynsha aýmaqtyq departamentke beredi. Qujattar basqa óńirdiń MÁS ádisnama jáne baqylaý bólimine qaraýǵa jiberiledi. Qorytyndy azamattyń jeke derekteri kórsetilmegen medıtsınalyq qujattar negizinde syrttaı qaıta qaralady.
Mundaı jaǵdaıda tıisti bólimge MÁS aktisi kelip túsken kúnnen bastap bes jumys kúni ishinde saraptamalyq qorytyndy shyǵarylady. Bul merzim qujattarǵa saraptamalyq baǵa berý kezeńine qatysty. Al QR Ákimshilik rásimdik-protsestik kodeksiniń 99-babyna sáıkes, zańnamada jekelegen jaǵdaılar úshin ózge merzimder belgilenýi múmkin. Mundaı jaǵdaıda shaǵym 20 jumys kúninde qaralatyn bolady.
Nátıjesinde buryn shyǵarylǵan saraptamalyq qorytyndy ózgertilýi nemese ózgerissiz qaldyrylýy yqtımal. Qabyldanǵan sheshimmen kelispegen jaǵdaıda azamat zańnamada belgilengen tártippen shaǵymdanýdy jalǵastyrýǵa quqyly.
2026 jyldyń toǵyz aıynda tikeleı jáne syrttaı proaktıvti formatta júrgizilgen MÁS nátıjelerine shaǵymdaný boıynsha 4 918 qaıta kýálandyrý ótkizildi. Onyń 440-y nemese 8,9%-ynda qaıta qaraý qorytyndysy boıynsha múgedektik belgilenip, ne múgedektik toby neǵurlym aýyr topqa ózgertildi.
Eske salaıyq, MÁS júrgizý jáne onyń nátıjelerine shaǵymdaný tártibi QR Áleýmettik kodeksimen jáne Medıtsınalyq-áleýmettik saraptama júrgizý qaǵıdalarymen retteledi.
Aıta ketelik múgedektigi bar adamdardyń quqyǵy buzylsa, qaıda shaǵymdanýǵa bolatyny týraly jazǵan edik.
