Múgedektik pen asyraýshysynan aıyrylý boıynsha tólemderge 496 mlrd teńge jumsaldy
ASTANA. KAZINFORM – Qazaqstandyqtarǵa jyl basynan beri múgedektigi jáne asyraýshysynan aıyrylýyna baılanysty 496 mlrd teńgege jýyq somada járdemaqylar men áleýmettik tólemder tólendi.
Eńbek jáne halyqty áleýmettik qorǵaý mınıstrliginiń málimetinshe, 2025 jyldyń basynan beri respýblıkalyq bıýdjetten múgedektigi boıynsha jáne asyraýshysynan aıyrylý jaǵdaıynda tólenetin memlekettik áleýmettik járdemaqylarǵa (MÁJ) 436,1 mlrd teńge baǵyttaldy. Budan bólek, Memlekettik áleýmettik saqtandyrý qorynan (MÁSQ) eńbekke qabilettiliginen aıyrylý jáne asyraýshysynan aıyrylý boıynsha 59,8 mlrd teńgege jýyq áleýmettik tólem júzege asyryldy.
- 2025 jylǵy 1 qyrkúıektegi jaǵdaı boıynsha múgedektigi úshin MÁJ alýshylar sany 543,7 myń adamdy, al asyraýshysynan aıyrylýyna baılanysty járdemaqy alýshylar 184,1 myń adamdy qurady.
MÁJ mólsheri múgedektiktiń tobyna, sebebine jáne «Respýblıkalyq bıýdjet týraly» zańda bekitilgen eń tómen kúnkóris deńgeıiniń shamasyna baılanysty belgilenedi. Al asyraýshysynan aıyrylý boıynsha járdemaqynyń kólemi qaıtys bolǵan asyraýshysynyń asyraýyndaǵy adamdar sanyna, qaıtys bolý sebepterine jáne eń tómen kúnkóris deńgeıine táýeldi bolady, - dep túsindirdi vedomstvodan.
Sonymen qatar mindetti áleýmettik saqtandyrý júıesine qatysýshylarǵa áleýmettik táýekelder oryn alǵan jaǵdaıda MÁSQ-dan tólemder tólenedi. 1 qyrkúıektegi derek boıynsha 97 myń adam eńbekke qabilettiliginen aıyrylýyna baılanysty áleýmettik tólem, al 65,9 myńǵa jýyq otbasy asyraýshysynan aıyrylýyna baılanysty tólem aldy.
Bul tólemderdiń kólemi sońǵy eki jyldaǵy áleýmettik aýdarymdar júrgizilgen ortasha aılyq tabysqa, eńbekke qabilettiliginen aıyrylý koeffıtsıentterine, asyraýyndaǵy adamdar sanyna jáne mindetti áleýmettik saqtandyrý júıesine qatysý ótiline baılanysty esepteledi.
Atalǵan áleýmettik tólemder respýblıkalyq bıýdjetten tólenetin járdemaqylarǵa qosymsha júrgiziledi.
- 2025 jylǵy 1 qańtardan bastap múgedektigi jáne asyraýshysynan aıyrylýy boıynsha MÁJ mólsheri eń tómen kúnkóris deńgeıiniń ulǵaıýyna baılanysty 6,5%-ǵa ósti. Sol sııaqty Úkimet sheshimimen MÁSQ esebinen tólenetin eńbekke qabilettiliginen aıyrylý jáne asyraýshysynan aıyrylý tólemderi de 6,5%-ǵa artty, - delingen aqparatta.
Máselen, jalpy aýrýdan múgedektigi boıynsha MÁJ kólemi bıylǵy jyly 1-top úshin – 101 702 teńgeni, 2-top úshin – 81 362 teńgeni, 3-top úshin – 55 474 teńgeni qurady. Al eńbekke qabilettiliginen aıyrylýyna baılanysty áleýmettik tólemderdiń ortasha mólsheri 71 468 teńgeni, asyraýshysynan aıyrylýyna baılanysty tólemder 74 460 teńgeni qurap otyr.
Aıta keteıik, múgedektigi bar adamdarǵa áýe bıletterine jeńildik jasaý týraly zań qaıta qaralady.