Múgedektik nege bir jylǵa, bes jylǵa nemese merzimsiz beriledi
ASTANA. KAZINFORM — Eńbek jáne halyqty áleýmettik qorǵaý mınıstrliginde múgedektik nege ártúrli merzimge belgilenetini túsindirildi.
Azamattarda nelikten bir adamǵa múgedektik bir jylǵa, ekinshisine bes jylǵa, al jekelegen jaǵdaılarda qaıta kýálandyrý merziminsiz belgilenetini týraly suraqtar jıi týyndaıdy.
QR Eńbek jáne halyqty áleýmettik qorǵaý mınıstrliginde múgedektikti belgileý merzimi dıagnozdyń ózine emes, organızm fýnktsııalarynyń buzylýyn jáne múgedektigi bar adamnyń qabiletterin qalpyna keltirýdiń naqty múmkindikteriniń boljamyna baılanysty aıqyndalatyny túsindirildi.
— Eger aýrýdyń, jaraqat saldarynyń nemese densaýlyq jaǵdaıynyń nátıjesinde organızm fýnktsııalarynyń buzylý dárejesi emdeý jáne ońaltý júrgizý nátıjesinde ózgerýi múmkin bolsa, múgedektik belgili bir merzimge belgilenedi. Bul adamnyń jaǵdaıyn qaıta baǵalaýǵa jáne onyń fýnktsıonaldyq múmkindikterinde ózgeristerdiń bolǵan-bolmaǵanyn aıqyndaýǵa múmkindik beredi. Qaıta kýálandyrý kezinde mamandar densaýlyq jaǵdaıynyń dınamıkasyn, júrgizilgen emdeý men ońaltý sharalarynyń nátıjesin, sondaı-aq tirshilik-áreketiniń shektelý dárejesin eskeredi. Osyǵan baılanysty múgedektik merzimi qaıta belgilenýi múmkin, — dep túsindirdi mamandar.
Merzimsiz múgedektik zańnamada kózdelgen jaǵdaılarda, organızm fýnktsııalarynyń buzylýy turaqty, qaıtymsyz jáne tolyq kólemde júrgizilgen ońaltý is-sharalary tıimsiz bolǵanda, sondaı-aq ońaltý áleýeti bolmaǵan kezde belgilenedi.
Osylaısha, birdeı dıagnozdyń bolýy múgedektiktiń merzimi de birdeı bolady degendi bildirmeıdi. Árbir jaǵdaı jeke qaralady. Sheshim densaýlyq jaǵdaıyn, organızm fýnktsııalarynyń buzylý dárejesin jáne olardyń qalpyna kelý múmkindigin keshendi baǵalaý negizinde qabyldanady.
Osyǵan deıin el boıynsha 1 333 saılaý ýchaskesi múgedektigi bar adamdarǵa tolyq beıimdelmegenin jazǵan edik.
