Múgedektikti syrttaı belgileý jobasy 6 óńirde iske qosylady

NUR-SULTAN. QazAqparat – 2021 jyly múgedektigi bar adamdarǵa beriletin áleýmettik tólemderge jáne ońaltýdyń tehnıkalyq quraldary men qyzmetterin usynýǵa 486 mlrd teńge qarastyrylǵan. Bul týraly halyqqa esep berý kezdesýinde QR Eńbek jáne halyqty áleýmettik qorǵaý mınıstri Serik Shápkenov aıtty, dep habarlaıdy QazAqparat tilshisi.

«2020 jyly mınıstrlik múgedektigi bar adamdardy áleýmettik qorǵaýdy jaqsartýǵa baǵyttalǵan normalary bar zań jobasyn ázirledi. Atap aıtqanda, múgedektik sebebine qaramastan I toptaǵy múgedektik kútimine járdemaqy engizý; 7 jastan 16 jasqa deıingi balalardy múgedektik toptary boıynsha járdemaqy mólsherin qaıta qaraı otyryp bólý; Múgedektigi boıynsha jáne asyraýshysynan aırylý jaǵdaıyna járdemaqylardy bir mezgilde alý quqyǵyn berý; kámeletke tolǵan múgedek balalardy tárbıelep otyrǵan otbasylar úshin turǵyn úı kezegin saqtaý jáne basqa da normalar. Osy zań bıyl qabyldanady dep kútilýde, zań jobasy Májiliste maquldandy», - dep atap ótti mınıstr.

Múgedektigi bar balalardy ońaltý qyzmetterimen qamtamasyz etý úshin jergilikti atqarýshy organdarmen birlesip shaǵyn ońaltý ortalyqtaryn ashý jumystary júrip jatyr. Bıyl 12 ortalyq ashylady, qazir onyń altaýy jumys istep tur.

«Múmkindigi shekteýli jandarǵa medıtsınalyq-áleýmettik saraptama júrgizý rásimi men merzimin ońtaılandyrý maqsatynda biz múgedektikti syrttaı belgileýdi engizý boıynsha jumys istep jatyrmyz. 1 shildeden bastap joba 6 óńirde, Nur-Sultan, Almaty qalalarynda, Batys Qazaqstan, Soltústik Qazaqstan, Aqmola jáne Qaraǵandy oblystarynda iske qosyla bastaıdy. Jobany júzege asyrý keleshekte múgedektigi bar adamdardyń quzyrly mekemelerge qaıta-qaıta barýyn jáne qyzmet kórsetýshimen tikeleı baılanysyn boldyrmaýǵa múmkindik beredi», – dep naqtylady Eńbek mınıstri.