Múgedektikti «syrttaı anyqtap taǵaıyndaý» jobasy jalǵasady
QR Eńbek jáne halyqty áleýmettik qorǵaý mınıstri Serik Shápkenov Úkimet otyrysynda osyndaı málimet berdi.
«Memleket basshysy 2021 jyldyń aqpan aıynda Ulttyq qoǵamdyq senim keńesiniń otyrysynda múmkindigi shekteýli jandarǵa barynsha qolaıly jaǵdaı jasaýdy, qaǵazbastylyqty alyp tastaýdy tapsyrdy. Osyǵan baılanysty bizdiń mınıstrlik Densaýlyq saqtaý jáne Tsıfrlyq damý mınıstrlikterimen birlesip, múgedektikti syrttaı anyqtaý boıynsha sharalar qabyldady. Búgingi tańda elimizdiń barlyq 17 óńirinde múgedektikti anyqtaý úshin medıtsınalyq-áleýmettik saraptama júrgizýdiń syrttaı formaty boıynsha pılottyq joba iske qosyldy. Bul rette azamat turǵylyqty jeri boıynsha emhanaǵa ǵana júginedi, qalǵan protsester aqparattyq júıelerdi ıntegratsııalaý arqyly adamnyń qatysýynsyz ótedi. Jalpy bıyl biz múgedektigi bar azamattardyń 20%-yn osy tásilmen qamtýdy josparlap otyrmyz», – dedi Serik Shápkenov.
Onyń málimeti boıynsha, 23 aqpandaǵy jaǵdaı boıynsha syrttaı formatta 6 753 ótinim qaralǵan
«Sonymen qatar, múgedektigi bar adamdar úshin 2021 jyldan bastap Áleýmettik qyzmetter portaly engizildi. Portal qyzmet jetkizýshilerin óz betinshe tańdaýǵa múmkindik beredi, al memleket taýardyń nemese qyzmettiń qunyn óteıdi. Osynyń arqasynda keıbir jaǵdaılarda qyzmetterdi alý merzimi alty aıdan 2 aptaǵa deıin qysqardy. Nátıjesinde 2021 jyly Portal arqyly 371 myńnan astam qyzmet kórsetildi jáne ońaltý baǵdarlamalarynyń oryndalýy 2019 jylǵy 62%-dan 2021 jyly 88%-ǵa deıin ulǵaıdy, al bıyl ońaltý baǵdarlamalarynyń oryndalý deńgeıi 90%-dan asady dep josparlap otyrmyz», – dedi mınıstr.
Sondaı-aq, ol 2020 jyldyń qarasha aıynan bastap halyqty jumyspen qamtý ortalyqtarynyń qyzmetterin onlaın rejımde kórsetý boıynsha pılottyq joba kezeń-kezeńimen iske qosylǵanyn atap ótti.
«Buǵan deıin azamattar jumys izdeý jáne jumyssyz retinde tirkelý úshin jumyspen qamtý ortalyǵyna, al jumysynan aıyrylýyna baılanysty áleýmettik tólem alý úshin Halyqqa qyzmet kórsetý ortalyǵyna júginýi tıis bolatyn. Qazir bul qyzmetterdi Elektrondyq eńbek bırjasy arqyly onlaın alýǵa bolady. Sonymen qatar, jumyssyz retinde tirkelý merzimi 10 kúnnen 3 kúnge deıin qysqartyldy.
2021 jyly 149 myń adam jumys izdeýshi retinde tirkeldi, onyń 33%-y onlaın-formatta tirkeldi, azamattardyń 60%-y jumysqa onlaın túrde ornalastyryldy», – dedi Serik Shápkenov.
