Múgedektikti belgileý boıynsha 9,6 myńnan astam ótinim syrttaı formatta qaraldy

NUR-SULTAN. QazAqparat - Múgedektik tobyn belgileý úshin medıtsınalyq-áleýmettik saraptama júrgizýdiń syrttaı formaty boıynsha pılottyq jobany iske asyrý aıasynda bıylǵy 11 naýryzdaǵy jaǵdaı boıynsha Qazaqstannyń barlyq óńirlerinen 9 609 ótinim qaraldy. Qazirgi ýaqytta jobaǵa 487 medıtsınalyq uıym qosylǵan, dep habarlaıdy QazAqparat tilshisi.

Buǵan deıin habarlanǵandaı, Ulttyq qoǵamdyq senim keńesiniń VI otyrysynda Memleket basshysy erekshe qajettilikteri bar adamdar úshin barynsha qolaıly jaǵdaı jasaýdy, olardyń ınstantsııalar men qaǵazbastylyq boıynsha júrýin, sondaı-aq qyzmet kórsetýshilerdiń qyzmet alýshylarmen baılanysyn boldyrmaýdy tapsyrdy.

Osy tapsyrmany iske asyrý aıasynda QR Eńbek jáne halyqty áleýmettik qorǵaý mınıstrligi Densaýlyq saqtaý men Tsıfrlyq damý, ınnovatsııalar jáne aeroǵarysh ónerkásibi mınıstrlikterimen birlesip, Qazaqstannyń barlyq 17 óńirinde pılottyq rejımde medıtsınalyq-áleýmettik saraptama júrgizýdiń syrttaı formaty boıynsha joba iske qosyldy. Múgedektik tobyn belgileý boıynsha qyzmet alý úshin ótinish berýshi tek turǵylyqty jeri boıynsha emhanaǵa baryp, qajetti tekserýden ótýi kerek, al qalǵan protsester Aqparattyq júıelerdi ıntegratsııalaý esebinen onyń qatysýynsyz ótedi.

«Buryn densaýlyǵynan aıyrylǵan azamattarǵa múgedektikti belgileý jáne tehnıkalyq quraldar (OTQ) men ońaltý qyzmetterin alý úshin ártúrli ınstantsııalarǵa júginýge týra keletin. Máselen, aldymen – tekserý úshin emhanaǵa, sodan keıin múgedektikti anyqtaý úshin medıtsınalyq-áleýmettik saraptama bólimine, sodan soń múgedektik belgilengennen keıin – járdemaqy taǵaıyndaý úshin «Azamattarǵa arnalǵan úkimet» memlekettik korporatsııasy» KEAQ-ta jáne OTQ men ońaltý qyzmetterin alý úshin ákimdikke júginýge májbúr bolatyn. Sodan keıin keıde birneshe aıǵa sozylǵan memlekettik satyp alý rásimderi ótkiziledi. Osylaısha, azamattar tehnıkalyq quraldar men qyzmetterdi ýaqtyly ala almady, sondaı-aq olardyń sapasyna árdaıym qanaǵattanbady. Endi pılottyq jobany iske asyrý aıasynda ótinish berýshi tek turǵylyqty jeri boıynsha emhanaǵa júginedi, al medıtsınalyq-áleýmettik saraptama emhanadaǵy dárigerlerdiń qorytyndysy negizinde onyń qatysýynsyz qashyqtan júrgiziledi. Járdemaqy múgedektik toby belgilengennen keıin avtomatty túrde taǵaıyndalady. OTQ jáne ońaltý qyzmetterin 2021 jyldan bastap Áleýmettik qyzmetter portaly arqyly óz betinshe tańdaı alady jáne tapsyrys bere alady. Al memleket olardyń qunyn óteıdi. Portaldyń arqasynda kezektilik protsesteri aıqyn boldy, keıbir jaǵdaılarda taýarlar men qyzmetterdi usyný merzimi jarty jyldan 2 aptaǵa deıin qysqardy», – dedi QR Eńbek jáne halyqty áleýmettik qorǵaý vıtse-mınıstri Erbol Ospanov.