Múgedektikti aıqyndaý elektrondyq formatqa kóshiriledi
ASTANA. QazAqparat - Qazaqstanda 2019 jyldan bastap adamnyń múgedektigin aıqyndaýdyń elektrondyq formaty engiziledi. Bul týraly Parlament Senatynda depýtattarmen kezdesý barysynda Eńbek jáne halyqty áleýmettik qorǵaý mınıstri Mádına Ábilqasymova málim etti, dep habarlaıdy QazAqparat tilshisi.
«2018 jyly mınıstrlik halyqaralyq tájirıbeni eskere otyryp, múgedektikti, eńbek etý qabiletinen aıyrylý dárejesin belgileý jáne áleýmettik qorǵaý sharalaryna qajettilikti aıqyndaý memlekettik qyzmetin avtomattandyrylǵan rejimde kórsetý boıynsha qanatqaqty jobany eldiń 4 óńirinde aprobatsııalaýda», - dedi mınıstr.
Onyń atap ótýinshe, osy jańa tetik ótinish berýshiniń qujattardy arqalap, túrli mekemelerde kezekte turýyn boldyrmaýǵa múmkindik beredi.
«Onyń ornyna azamattar jeke ózderi barmaı, medıtsınalyq derekteri negizinde syrttaı kýálandyrýdan ótedi. Bul qanatqaqty rejim búginde Qaraǵandy, Aqmola, Qostanaı jáne Batys Qazaqstan oblystarynda iske asyrylyp jatyr. Qalǵan óńirlerde 2019 jyldan bastap júzege asyramyz», - dep túıdi M. Ábilqasymova.
