Múgedektikti anyqtaý boıynsha 32 myńǵa jýyq ótinim syrttaı qaraldy

NUR-SULTAN. QazAqparat - Múgedektik tobyn belgileý úshin medıtsınalyq-áleýmettik saraptama júrgizýdiń syrttaı formaty boıynsha pılottyq jobany iske asyrý sheńberinde 2022 jyldyń basynan bastap Qazaqstannyń barlyq óńirlerinen 31,9 myńǵa jýyq ótinim qaraldy. Qazirgi ýaqytta jobaǵa 599 medıtsınalyq uıym qosylǵan, dep habarlaıdy QR Eńbek jáne halyqty áleýmettik qorǵaý mınıstrliginiń baspasóz qyzmeti.

Pılottyq joba arqyly 2022 jyly múgedektikti belgileý boıynsha syrttaı qyzmet kórsetýmen qamtýdy 20% - ǵa deıin jetkizý josparlanǵan. Qazirgi ýaqytta bul kórsetkish 22%-dy quraıdy.

Buǵan deıin habarlanǵandaı, Ulttyq qoǵamdyq senim keńesiniń VI otyrysynda Memleket basshysy erekshe qajettilikteri bar adamdar úshin barynsha qolaıly jaǵdaı jasaýdy, olardy qaǵazbastylyqtan aryltýdy, ınstantsııalar boıynsha júrýin jáne qyzmet kórsetýshilerdiń qyzmet alýshylarmen baılanysyn boldyrmaýdy tapsyrdy.

Osy tapsyrmany oryndaý maqsatynda QR Eńbek jáne halyqty áleýmettik qorǵaý mınıstrligi Densaýlyq saqtaý jáne Tsıfrlyq damý, ınnovatsııalar jáne aeroǵarysh ónerkásibi mınıstrlikterimen birlesip, Qazaqstannyń barlyq 20 óńirinde pılottyq rejımde medıtsınalyq-áleýmettik saraptama (budan ári – MÁS) júrgizýdiń syrttaı formaty boıynsha joba iske asyrýda.

Múgedektik tobyn anyqtaý boıynsha qyzmet alý úshin ótinish berýshi tek turǵylyqty jeri boıynsha emhanaǵa baryp, qajetti tekserýden ótýi qajet, qalǵan protsester aqparattyq júıelerdi ıntegratsııalaý esebinen onyń qatysýynsyz ótedi.

Jalpy, syrttaı kýálandyrýǵa kóshý:

- ákimshilik jáne bıýrokratııalyq kedergilerdi joıady;

- MÁS saraptamalyq sheshimderiniń ashyqtyǵyn qamtamasyz etedi;

- úıden shyqpaı-aq múgedektikti belgileý jáne múgedektigi bar adamdardy áleýmettik qorǵaý sharalaryn aıqyndaý boıynsha qyzmetter alýǵa múmkindik beredi;

- kórsetiletin qyzmetti alýshynyń kórsetiletin qyzmetti berýshimen tikeleı baılanysyn boldyrmaıdy, osylaısha sybaılas jemqorlyq táýekelderin barynsha azaıtady.