Múgedektikti alý úshin dərigerdiń aldyna barýdyń qajeti bolmaıdy
ORAL. QazAqparat - Oralda múgedektikti taǵaıyndaýda qanatqaqty joba júzege asyrylmaq. Bul týraly QR Eńbek jáne halyqty áleýmettik qorǵaý vıtse-mınıstri Svetlana Jaqypova BQO-ǵa jumys sapary kezinde málim etti, dep habarlaıdy QazAqparat tilshisi.
Oraldaǵy №3 emhana jumysymen tanysqan vıtse-mınıstrdiń sózine qaraǵanda, BQO medıtsınalyq aqparattandyrý júıesi boıynsha óńirler arasynda kóshbasshy bolǵandyqtan, atalmysh joba aldymen osynda qolǵa alynyp otyr.
Mundaǵy basty maqsat - múgedektikti taǵaıyndaý kezinde kórsetiletin memlekettik qyzmet sapasyn jaqsartý. Osy kezge deıin azamattar múgedektik alý úshin emhanada tekserilip, tıisti qujattar jınaıtyn. Sosyn medıtsınalyq-áleýmettik saraptamadan ótip, dáriger-sarapshylardyń aldyna keletin. Endi olaı bolmaıdy, múgedektik emdelýshiniń qatysynsyz taǵaıyndalady. Adam aǵzasyndaǵy barlyq kórsetkishter densaýlyq saqtaý júıesine elektrondy túrde túsip, sonyń negizinde táýelsiz sarapshylar múgedektikti taǵaıyndaıdy.
«Eń aldymen emdelýshiler múgedektigin dáleldeý úshin burynǵydaı tabaldyryq tozdyrmaıtyn bolady. Ekinshiden, jemqorlyqtyń joly kesiledi. Óıtkeni táýelsiz sarapshylar múgedektiktiń kimge taǵaıyndalyp otyrǵanyn bilmeıtin bolady», - dedi vıtse-mınıstr.
Batys Qazaqstan oblysynda bul jobany mamyr aıynda iske qosý kózdelýde.
Elimiz boıynsha atalmysh qanatqaqty joba BQO-men qatar Qaraǵandy, Aqmola, Qostanaı oblystarynda qolǵa alynbaq. Oralda bul joba aldymen №3 emhanada engiziledi. Tájirıbe sátti bolsa, basqa jerlerge de taratylady.
Aıta keteıik, sapar barysynda tsıfrlandyrý baǵytyndaǵy atalmysh jobany júzege asyrý maqsatynda QR Densaýlyq saqtaý mınıstrligi, Eńbek jáne halyqty áleýmettik qorǵaý mınıstrligi, «Jarqyn bolashaq» tsıfrlandyrýdy júzege asyrýshy kompanııa jáne BQO ákimdigi arasynda tórtjaqty memorandýmǵa qol qoıyldy.
