Múgedektigi bar jandarǵa jaǵdaı jasamaǵan nysan basshylaryna 60 mln teńge aıyppul salyndy

ASTANA. QazAqparat – Byltyr múgedektigi bar jandar úshin qolaıly jaǵdaı jasamaǵan 300-ge jýyq nysannyń basshysyna 60 mln teńge aıyppul salyndy. Muny Eńbek jáne áleýmettik qorǵaý komıtetiniń tóraǵasy Tólegen Ospanqulov aıtty, dep habarlaıdy QazAqparat tilshisi.

«Byltyr komıtettiń aýmaqtyq departamentteri múgedektigi bar adamdar úshin obektilerdiń qoljetimdiligin qamtamasyz etý bóliginde 1 181 tekserý júrgizdi. Onyń nátıjesinde 4 myńnan astam talapqa saı kelmeıtin faktiler anyqtaldy. Tıisinshe, nysan ıelerine 900-den astam uıǵarym berilip, 60 mln teńgeden astam somaǵa 300-ge jýyq aıyppul salyndy», - dep málim etti», - Tólegen Ospanqulov Ortalyq kommýnıkatsııalar qyzmetinde ótken brıfıngide.

Jalpy el boıynsha bul baǵytta tekserý júrgizetin 227 monıtorıngtik top jumys isteıdi, olardyń quramynda 1 630 adam bar.

«Byltyrdan bastap Eńbek mınıstrligi janynan múgedektigi bar adamdar úshin áleýmettik ınfraqurylym obektileriniń qoljetimdiligin qamtamasyz etý máselelerin qaraý boıynsha respýblıkalyq jumys toby quryldy. Onyń quramyna múgedektigi bar adamdar birlestikteriniń tóraǵalary, múgedektigi bar adamdar máseleleri boıynsha ákimderdiń keńesshileri jáne múddeli memlekettik organdardyń ókilderi kirdi», - dep túıindedi Tólegen Ospanqulov.

Sonymen qosa komıtet basshysy aldaǵy eki jylda múmkindigi shekteýli adamdar úshin 13 myńǵa jýyq nysan beıimdeletinin atap ótti.