Múgedektigi bar jandarǵa arnalǵan portal tıimdiligin kórsetip otyr - Túrkistan oblysy

TÚRKІSTAN. QazAqparat - Byltyr pılottyq rejımde memlekettik qyzmetterdiń sapasy men qoljetimdiligin arttyrý maqsatynda múgedektigi bar azamattardyń áleýmettik qyzmetterdi paıdalanýǵa arnalǵan aleumet.egov.kz portaly iske qosylǵan bolatyn. Búginde tehnıkalyq ońaltý quraldarynyń 24 túrine jáne memlekettik mekemelerde arnaıy áleýmettik qyzmetterge tapsyrys berýge arnalǵan bul júıe óz tıimdiligin kórsetip otyr, dep habarlaıdy QazAqparat Túrkistan oblysy ákiminiń baspasóz qyzmetine silteme jasap.

Bul jóninde QR Eńbek jáne halyqty áleýmettik qorǵaý mınıstriniń keńesshisi Aıjanı Nurlanova brıfıngte málimdedi.

QR Eńbek jáne halyqty áleýmettik qorǵaý mınıstri Serik Jambylulynyń tapsyrmasyna sáıkes, jańa portaldy nasıhattaý, jumystaryn tanystyrý maqsatynda Túrkistan qalasynda, Tóle bı, Keles, Túlkibas aýdandarynyń turǵyndarymen kezdesý uıymdastyrylyp, portaldyń jumys barysy qadaǵalandy.

«Júıeniń maqsaty – múgedektigi bar jandardyń jetkizýshilermen tikeleı deldalsyz baılanysty qamtamasyz etý. Portalda qyzmetterdi alý úshin elektrondyq tsıfrlyq qoltańba (ETsQ) bolýy kerek. Portaldyń basty artyqshylyǵy - paıdalanýshylardyń qajettilikterin eskere otyryp, ońaltý tehnıkalyq quraldaryn tańdaý múmkindigi. Sondaı-aq, múgedektigi bar azamattardyń qajetti zattaryna tez arada qol jetkize alady. Buryn memlekettik satyp alý arqyly tehnıkalyq qural-jabdyqtarmen qamtý kezinde azamat 8 aıǵa deıin kútýi kerek bolsa, endi portalǵa tapsyrys berýden bastap úıge jetkizýge deıingi ýaqyt 15 kúnge deıin qysqardy. Eń bastysy, múgedektigi bar azamattar taýarlar men qyzmetterdiń qajetti túrin óz betinshe tańdaı alady. Biz aýdandardy aralaý barysynda portalmen jumys isteý barysy tekserildi. Aımaqtarda anyqtalǵan máseleler der kezinde sheshimin tapty. Sondaı-aq, turǵyndar QR Eńbek jáne halyqty áleýmettik qorǵaý vıtse-mınıstri Erbol Ospanovqa tolǵandyrǵan saýaldaryn tikeleı uıaly baılanys arqyly qoıyp, jaýaptaryn aldy. Múgedektigi bar azamattar portal paıda bolǵaly qajetti zattarynyń sapasy artqandyǵyn aıtty. Qoldaýǵa muqtaj azamattardyń qajettiligin qamtamasyz etý, taýar men qyzmettiń sapasy – mınıstrdiń tikeleı baqylaýynda»,- dedi mınıstr keńesshisi.

Búgingi tańda portaldaǵy tizilimde 64 qyzmet túri bar. Atap aıtqanda, 14-i ymdaý tili mamany, 18 jeke kómekshiniń qyzmetin kórsetý, 14 ońaltý tehnıkalyq quraldary jáne 18 uıym sanatorıı-kýrorttyq emdeý qyzmetin qamtamasyz etýge arnalǵan. Sonymen qatar, 9 ymdaý tili mamany jáne 85 jeke kómekshi portalda jeke tulǵa retinde tirkelgen.