Múgedektigi bar jandarǵa 98 myńnan astam qyzmet portalmen kórsetildi

NUR-SULTAN. QazAqparat - Aǵymdaǵy jyldyń basynan bastap Áleýmettik qyzmetter portaly (budan ári – Portal) arqyly shamamen 57,7 myń múgedektigi bar adam ońaltýdyń tehnıkalyq quraldaryn (budan ári – OTQ), 6,9 myńy – ymdaý tili qyzmetin, 33,5 myńy – jeke kómekshiniń qyzmetin aldy. Sondaı-aq, Portal arqyly kepildik berilgen áleýmettik toptamalarǵa 7 myń tapsyrys rásimdeldi, dep habarlaıdy QazAqparat QR Eńbek jáne halyqty áleýmettik qorǵaý mınıstrliginiń baspasóz qyzmetine silteme jasap.

Portal múgedektigi bar adamdarǵa ońaltýdyń tehnıkalyq quraldary men qyzmetterin óndirýshini jáne jetkizýshini óz betinshe tańdaýǵa múmkindik beredi. Kómek túrine tapsyrys berý kórsetiletin qyzmetti alýshynyń elektrondyq tsıfrlyq qoltańbasymen rastaý arqyly júzege asyrylady. Tapsyrys berilgen ońaltýdyń tehnıkalyq quraldaryn jetkizý nemese óz betinshe áketý arqyly alýǵa bolady.

Múgedektigi bar adamdardy ońaltý quraldarymen qamtamasyz etý protezdik-ortopedııalyq, sýrdotehnıkalyq, tıflotehnıkalyq jáne gıgıenalyq quraldar, sondaı-aq kreslo-arbalar berýdi qamtıdy.

Búgingi kúni Portalda arnaýly áleýmettik qyzmetter kórsetetin 807 medıtsınalyq-áleýmettik mekeme (bólimsheler), 190 OTQ jetkizýshi, 16 myńnan astam jeke kómekshi, 296 ymdaý tilin qyzmetin, 91 sanatorlyq-kýrorttyq emdeýdi, 137 kepildik berilgen áleýmettik toptamany jetkizýshiler tirkelgen.

«Áleýmettik qyzmetter portaly» avtomattandyrylǵan aqparattyq júıesin engizý Múgedektigi bar adamdardyń quqyqtaryn qamtamasyz etý jáne ómir súrý sapasyn jaqsartý jónindegi ulttyq jospar sheńberinde qarastyrylǵan.

Qoldaýǵa arnalǵan baılanys ortalyǵyna 1414 biryńǵaı nómirine qońyraý shalyp, tildi tańdaý jáne 5 sanyn basý arqyly Portaldy paıdalaný boıynsha keńes alýǵa bolady.