Múgedektigi bar jandar úıinde otyra bergennen góri qalaǵa shyǵyp, mektep, demalys oryndaryna shyǵyp turǵany jón - Á. Amanbaev
ALMATY. 26 shilde. QazAqparat /Ádilet Musahaev/ - Eger elimizdiń kásipkerleri "Almaty GazInjenerıng" kompanııasynan úlgi alyp, demeýshilik jasasa, múgedektigi bar adamdar tóńiregindegi máseleler jyldamyraq sheshiler edi. Bul jaıynda búgin Almaty qalalyq múgedekter qoǵamynyń tóraǵasy Álı Amanbaev múgedek jandardy tasıtyn avtokóliktiń tabystalýy kezinde aıtty.
Ol búgingi tabystalyp jatqan kólikterdiń mańyzy óte zor ekendigin jáne múgedektigi bar jandar tórt qabyrǵanyń ishinde otyra bergennen góri qalaǵa shyǵyp, mektep, demalys oryndaryna shyǵyp turǵany jón ekendigin jetkizdi.
"Qazirgi kúni múgedektigi bar adamdardyń qoǵamǵa etene aralasýy úshin túrli mektepter, mádenı úıirmeler ashylýda. Alaıda olar úıinen shyǵa almaı, sol mekemelerge bara almasa, ondaı úıirmelerdiń esh paıdasy joq. Sondyqtan múgedektigi bar jandardy tasymaldaıtyn arnaıy avtokólikter jumys istegeni oryndy", -deıdi Á.Amanbaev.
Sonymen qatar ol múgedek jandar da basqalar sekildi barlyq isterge aralasýyna múmkindigi bar ekendigin, máselen sport, mádenı is-sharalarmen aınalysýyna tolyqtaı quqyly, tek ondaı jandarǵa jaǵdaı jasaý qajettigin jetkizdi.
"Qazir demalys kúnderi saıabaqtardyń mańaıyna barsańyz múgedektigi bar adamdardyń kóptep júrgendigin baıqaısyz. Bul olardy tasymaldaıtyn arnaıy kólikterdiń paıda bolýymen baılanysty. Kelesi jyly qala bıýdjetinen qomaqty qarjy bólinedi dep kútilýde, eger olaı bolsa basqa toptaǵy múgedektigi bar jandardy da qalanyń kez-kelgen jerine jetkizý múmkindigi týady", -dep atap ótti Álı Amanbaev.
Sondaı-aq ol kózi jóndi kórmeıtin adamdardy da arnaıy kóliktermen tasymaldaý kerektigin, áıtpese qoǵamdyq kólikterde olar qatty qınalatyndyǵyn atap ótti.
