Múgedektigi bar túrkistandyqtar qumyra jasaý jáne gúl ósirý daǵdylaryn meńgeredi

TÚRKІSTAN. QazAqparat – Qumyra jasaý jáne gúl ósirýden sheberlik saǵattary Saıram aýdany, Aqsýkent aýyly jáne Túrkistan qalasynyń múgedektigi bar turǵyndary úshin ótkiziledi dep, habarlaıdy QazAqparat Azamattyq bastamalardy qoldaý ortalyǵynyń baspasóz qyzmetine silteme jasap.

Aqparat jáne qoǵamdyq damý mınıstrliginiń tapsyrysy boıynsha «Qorǵan-M» qoǵamdyq birlestigi Túrkistan oblysynda ınklıýzıvti qoǵamdy damytýǵa jáne múgedektigi bar adamdardyń turaqty ıntegratsııasyna járdemdesýge baǵyttalǵan jobany iske asyryp keledi.

Joba aıasynda qoǵam belsendileri psıhologııalyq jáne zańgerlik kómek kórsetedi, kásiptik oqytý júrgizip, azamattardyń jumysqa ornalasýyna járdemdesedi. Osylaısha, 20 benefıtsıarǵa arnalǵan qyshtan qumyra jasaý jáne gúl ósirýden sheberlik saǵattary uıymdastyryldy.

«Oqytý «Ten Qogam» múgedektigi bar adamdardy qoldaý jáne áleýmettik beıimdeý ortalyqtarynyń bazasynda oflaın formatta júrgiziledi. Trenerler benefıtsıarlarǵa oqý aıaqtalǵannan keıin de qoldaý kórsetedi. Sheberlik saǵattary aıasynda 20-dan astam adamdy qamtýdy josparlap otyrmyz. Biz benefıtsıarlarǵa jumys ornyn tańdaý kezinde de, jumys ujymyna qosylý kezinde de, sondaı-aq jumysqa ornalasqannan keıingi birinshi kezeńde qoldaý kórsetýdi basty nazarǵa alamyz. Osylaısha, biz maqsatty aýdıtorııamyzdy barynsha tıimdi áleýmettendire alamyz», - deıdi joba jetekshisi Dıana Qyrǵyzbaeva.

Áleýmettik joba osy jyldyń qyrkúıeginde aıaqtalady.