Múgedektigi bar balalarǵa beriletin járdemaqy mólsheri arta ma

ASTANA. QazAqparat – Múgedektigi bar adamdarǵa áleýmettik qoldaý Áleýmettik kodeks jobasy aıasynda jalǵasady. Bul týraly Májilistiń taratylǵan 8-shaqyrym depýtattarynyń saýalyna Premer-Mınıstrdiń orynbasary Altaı Kólginovtiń jaýabynda aıtylǵan, dep habarlaıdy QazAqparat tilshisi.

«2023 jylǵy 1 qańtardan bastap múgedektigi boıynsha memlekettik áleýmettik járdemaqy mólsheri 8,5 paıyzǵa (2022 jyly eki ret 1 qańtardan – 5 %-ǵa, 1 sáýirden – 4 %-ǵa) arttyryldy. Múgedektigi bar balalar men olardy tárbıelep otyrǵan otbasylardyń quqyqtary men múddelerin qorǵaý maqsatynda qoldanystaǵy zańnamaǵa birqatar ózgerister engiziledi. Atap aıtqanda, 2021 jyly múgedektiktiń sebebine qaramastan, birinshi toptaǵy múgedektigi bar adamdarǵa kútim jasaıtyn adamdarǵa arnalǵan járdemaqylar engizildi. 7 jastan 16 jasqa deıingi múgedektigi bar balalardy múgedektik toptary boıynsha bólý júrgizildi. Nátıjesinde áleýmettik járdemaqylardyń mólsheri ulǵaıdy», - dedi Úkimet basshysynyń orynbasary jaýabynda.

Sonymen qatar ol 2022 jylǵy 27 maýsymda múgedektigi bar adamdardyń ómir súrý sapasyn jaqsartýǵa baǵyttalǵan densaýlyq saqtaý uıymdarynda olarǵa birinshi kezekte qyzmet kórsetý quqyǵyn aıqyndaý, múgedektigi bar balany sanatorıı-kýrorttyq emdelýge alyp júretin zańdy ókilderdiń birine emdelý qunyn óteý (70 paıyz mólsherinde), medıtsınalyq-áleýmettik saraptamadan syrttaı ótý múmkindigi jáne taǵy basqa ózgerister engizilgenin atap ótedi.

«Osylaısha, memleket tarapynan múgedektigi bar adamdardy áleýmettik qoldaý boıynsha keshendi jumystar júrgizilýde jáne bul baǵyttaǵy jumystar Áleýmettik kodeks jobasy aıasynda jalǵasatyn bolady», - dedi Altaı Kólginov.