Múgedektigi bar balalardy urǵan astanalyq tárbıeshiniń isin qaraǵan sýdıa aýysty
«19 shilde kúni biz sot otyrysyna keldik. Bizge hatshy sýdıanyń aýystyrylyp jatqanyn, endigi otyrysta isti basqa sýdıa qaraıtynyn jetkizdi. Ne sebepti dep suraǵanymyzda, bizdiń isti qarap jatqan sýdıanyń jumys babymen Almaty oblysyna aýysyp jatqanyn aıtty», - dedi QazAqparat tilshisine jábirlenýshi Galına Nıkolaeva.
Esterińizge sala keteıik, Astanada «Balam-aı» múgedektigi bar balalardy áleýmettik qoldaý ortalyǵynda sábılerdi urǵan tárbıeshige qatysty sot bastalǵanyn habarlaǵan bolatynbyz.
Aıyptalýshy – 33 jastaǵy áıel. Onyń óziniń múgedektigi bar. Sóılemeıdi, qulaǵy estimeıdi. Sot zalynda ol arnaıy sýrdoaýdarmashynyń kómegimen jaýap berip otyrdy. Biraq, kúdikti ózine taǵylǵan aıyptardyń birin de moıyndamaıtynyn jetkizdi. Sondaı-aq, ózin beınetaspaǵa túsirýge qarsylyq bildirdi. Sýdıa onyń talaptaryn qanaǵattandyrdy.
Aıta keteıik, kúdiktiniń ústinen bastapqyda QR QK 140-baby boıynsha qylmystyq is qozǵalǵan bolatyn.
«Tergeý barysynda is QR QK 110-baby 2-tarmaǵy boıynsha qaıta saralandy. Bul bap boıynsha 5 jylǵa deıin bas bostandyǵynan aıyrý jazasy nemese aıyppul qarastyrylǵan», - dedi jábirlenýshi taraptyń qorǵaýshysy Arjan Sádýaqas.
Esterińizge sala keteıik, ortalyqta beınebaqylaý kamerasyna túsken kadrlardaǵy jaıt kópshiliktiń jaǵasyn ustatty. Erekshe balalardy uryp-soǵý oqıǵasyn bas prokýror baqylaýyna alǵan bolatyn.