Múgedektigi bar balalar balabaqsha kezegine qalaı alynady

ASTANA. QazAqparat – QR Premer-Mınıstriniń orynbasary Altaı Kólginov Májilis depýtattarynyń saýalyna joldaǵan jaýabynda múgedektigi bar balalar balabaqsha kezegine qalaı alynatynyn túsindirdi, dep habarlaıdy QazAqparat tilshisi.

«QR «Pedagog mártebesi týraly» Zańyna sáıkes erekshe bilim berýdi qajet etetin balalar, múgedek balasy bar otbasyndaǵy balalar mektepke deıingi uıymdardan birinshi kezekte oryn alýǵa úmitker bolyp tabylady. Mektepke deıingi uıymdardyń úlgilik qaǵıdalaryna sáıkes (Qazaqstan Respýblıkasy Oqý-aǵartý mınıstriniń 2022 jylǵy 31 tamyzdaǵy № 385 buıryǵy) memlekettik mektepke deıingi uıymdarda jáne memlekettik bilim berý tapsyrysy ornalastyrylǵan jekemenshik mektepke deıingi uıymdarda ata-ana balanyń tamaqtanýyna ketetin shyǵynnyń 100%-yn tóleıdi», - dep jazylǵan jaýapta.

Altaı Kólginovtiń málimeti boıynsha, Azamattyq avıatsııa komıteti múgedektigi bar balalar úshin syrtqy jáne ishki reısterge alǵan bılet qunyn ishinara sýbsıdııalaý máselesin qarastyrýy múmkin.

«Múgedektigi bar jolaýshylarǵa ishki jáne halyqaralyq reısterge turaqty negizde 50% jeńildik berý máselesine kelsek, azamattyq avıatsııa salasyndaǵy ýákiletti organ múgedektigi bar jolaýshylarǵa otandyq avıakompanııalardyń ishki jáne halyqaralyq reısterine jeńildik berýdi qarjylandyrý máselesi sýbsıdııalaý arqyly qarastyratyn bolady», - dep jazady vıtse-Premer.