Múgedektigi bar azamattarǵa arnalǵan járdemaqy 14,5 paıyzǵa kóterilmek

ASTANA. QazAqparat – Múgedektigi bar azamattarǵa, olarǵa kútim jasaıtyndarǵa beriletin áleýmettik járdemaqylar mólsherin taǵy 14,5 paıyzǵa kóterý máselesi pysyqtalyp jatyr. Bul týraly Úkimet otyrysynda Prezıdenttiń QR Parlamenti sessııasynyń ashylýynda bergen tapsyrmalaryn iske asyrý barysyn talqylaý kezinde Eńbek jáne halyqty áleýmettik qorǵaý mınıstriniń mindetin atqarýshy Tamara Dúısenova aıtty, dep habarlaıdy QazAqparat tilshisi.

«Múgedektigi bar jáne asyraýshylarynan aıyrylǵan azamattardy áleýmettik qoldaý kúsheıtiledi. Jyl basynda memlekettik járdemaqylardyń barlyq túrleri 8,5 paıyzǵa ósti. Qazir Memleket basshysynyń tapsyrmalaryn oryndaý úshin Qarjy mınıstrligimen birlesip, múgedektigi bar azamattarǵa, olarǵa kútim jasaıtyn tulǵalarǵa jáne asyraýshysynan aıyrylǵan azamattarǵa beriletin áleýmettik járdemaqylar mólsherin taǵy 14,5 paıyzǵa kóterý máselesin pysyqtap, esep-qısabyn jasap jatyrmyz. Qosymsha qajet qarajat 43 mıllıard teńgeden asady», - dedi T. Dúısenova.

Sonymen qatar ol múgedektigi bar adamdardyń turmys sapasyn jaqsartýǵa arnalǵan qanatqaqty jobalarǵa toqtaldy.

«Buǵan qosymsha 1 shildeden bastap múgedektigi bar azamattardy joǵary sapaly katetermen qamtamasyz etý úshin respýblıkalyq bıýdjetti naqtylaý kezinde qosymsha 328 mln teńge bólindi. Gıgıenalyq quraldardyń normatıvin 2 esege jergilikti bıýdjet qarajaty esebinen kóbeıtý qarastyryldy. Psıhıkalyq aýytqýy bar balalardy sanatorıı-kýrorttarǵa emdeýge jiberý krıterııleri Densaýlyq saqtaý mınıstrligimen birge aıqyndalyp, bıyl qanatqaqty rejımde elimiz boıynsha 1000 bala saýyqtyrý shıpajaılaryna jiberilmek. Sonymen qatar, pılot rejımde jan basyna shaqqandaǵy normatıvti endirý jáne áleýmettik qyzmet kórsetýge jeke sektordy keńinen tartý qarastyryldy. Bul qadamdar 7 óńirde iske asyrylady», - dedi mınıstrdiń mindetin atqarýshy.