Múgedektigi bar áıelder QR Parlament Májilisi men máslıhattarda oryn alýǵa daıyn - Lázzat Qaltaeva
ALMATY. 7 jeltoqsan. QazAqparat /Názıra Eleýhan/ - Múgedektigi bar áıelder QR Parlament Májilisine jáne máslıhattarda aldaǵy saılaýǵa qatysý úshin arnaıy oqýdan ótti.
Bul týraly búgin Almatyda ótken arnaıy baspasóz máslıhatynda aıtyldy.
Esterińizge sala ketsek, «TBRJ» QQ men «Shyraq» múgedek áıelder qaýymdastyǵy» qoǵamdyq birlestigi AQSh-tyń Qazaqstandaǵy Elshiliginiń «Demokratııalyq komıssııasy», "Kıýnnıýs" qaýymdastyǵy jáne Fınlıandııa úkimetiniń qoldaýymen bıylǵy jyldyń 21 qyrkúıeginen bastap «QR múgedektigi bar áıelderdiń saılaý quqyqtaryn (saılaý jáne saılaný quqyqtaryn) júzege asyrýǵa úıretý arqyly saıası qatysý daǵdylaryn qalyptastyrý» jobasyn júzege asyrýdy bastaǵan bolatyn.
«Jobany júzege asyrý sheńberinde jaqynda 5-6 jeltoqsan aralyǵynda Almaty qalasyndaǵy «Alataý» shıpajaıynda elimizdiń 14 aımaǵynan kelgen, sondaı-aq Almaty qalasynan 30-dan asa múgedektigi bar áıelder úshin eki kúndik jattyǵý ótkizildi. Jattyǵý nátıjesinde qatysýshylar memlekettik organdar men jergilikti ózin-ózi basqarý organdaryna saılaý jáne saılaný, sonymen birge respýblıkalyq referendýmǵa qatysý arqyly memlekettik isterdi basqarýǵa qatysý, erkin jáne ádil saılaýǵa qatysý quqyqtaryn júzege asyrý salasynda teorııalyq jáne tájirıbelik bilim aldy. Dáristerdi eleýli tájirıbesi bar halyqaralyq jáne jergilikti sarapshylar ótkizdi. Endi, erekshe muqtajdary bar áıelder alǵan bilim men daǵdylardy aldaǵy saılaýda qoldanyp, óz úmitkerlerin usyna alatyn bolady»,-dedi «Shyraq» múgedek áıelder qaýymdastyǵy» qoǵamdyq birlestiginiń tóraıymy Lázzat Qaltaeva.
Onyń aıtýynsha, múgedektigi bar áıelder QR Parlament Májilisi men máslıhattarda oryn alýǵa daıyn. «Biz osy maqsatta josparly túrde jumys istep kelemiz. Sondyqtan bizdiń 10 úmitkerimiz jetistikke jetýge kepil bere otyryp, kásibı deńgeıdi úmitkerligin usynýǵa jáne saılaýǵa túsege daıyn»,-dep atap ótti Lázzat Qaltaeva.
Onyń pikirinshe, bılikte osyndaı jandar otyrmaıynsha, múgedektikke baılanysty jáne múgedek áıelderdiń máselesina qatysty problemalar sheshimin tappaıdy.
«Múgedektigi bar áıelder múgedek áıelderdiń máselesinen basqa kóp nárseni aıta alady. Olardyń bilimi óte tereń jáne áleýeti joǵary. Ondaı jandar memlekettik deńgeıde kóp máselelerdi sheship, eldiń gúldenýi men jetistikke jetýine yqpal ete alady»,-dedi L. Qaltaeva.
