Múgedektigi bar adamǵa kómekshi retinde otbasy músheleri tartylady

ASTANA. QazAqparat – Múgedektigi bar adamdarǵa qyzmet kórsetý isine olardyń otbasy múshelerin tartý qarastyrylyp otyr. Bul týraly Senattyń jalpy otyrysynda QR Áleýmettik kodeksiniń jobasy men ilespe zań jobalaryn birinshi oqylymda talqylaý kezinde QR Eńbek jáne halyqty áleýmettik qorǵaý mınıstri Tamara Dúısenova aıtty, dep habarlaıdy QazAqparat tilshisi.

«Kodekstiń kelesi jańalyǵy áleýmettik qyzmet kórsetý júıesin transfomatsııalaýǵa qatysty. Onyń basty maqsaty - múgedektigi bar adamdar úshin, ásirese, aýyldy jerlerde arnaýly áleýmettik qyzmetterdi kóbeıtý.

«Múgedektigi bar adamdarǵa qyzmet kórsetý isine olardyń otbasy múshelerin tartý eskerilgen. Bul rette otbasy múshesi jeke kómekshi retinde rásimdeledi. Bul jumysqa eńbekaqy tólenedi jáne osy kiristen áleýmettik tólemder men zeınetaqy jarnalary aýdarylady. Bul turǵyda otbasy músheleri eńbekke qabiletti jasynda jumyspen qamtylady», - dedi T. Dúısenova.

Ekinshiden, arnaýly áleýmettik qyzmetterdiń jańa standarttaryn daıarlap, jan basyna shaqqandaǵy normatıvterdi engizý qarastyrylyp otyr.

«Onyń mólsheri qyzmetter úshin jeke normatıv, al kompensatorlyq tehnıkalyq quraldar úshin shekteýli baǵalar túrinde jikteletin bolady. Bul ózgerister bir jaǵynan keıbir jekelegen qyzmet nemese taýar túrlerin monetızatsııalaýǵa alyp keledi. Ekinshi jaǵynan, áleýmettik qyzmet kórsetýge jeke sektordy keńinen tartý arqyly salanyń ınfrastrýktýrasyn aýyldy jerge deıin jetkizýge múmkindik beredi», - dedi mınıstr.

Sonymen qatar Áleýmettik qyzmet portaly boıynsha jergilikti atqarýshy organdar janynda qurylǵan komıssııalarǵa jańa quzyretter berý josparlanǵan.

Budan buryn habarlanǵandaı, Áleýmettik kodeks jobasynda qaǵaz qujattar júıeden shyǵaryp, járdemaqylardy proaktıvti formatta bekitý eskerilgen.