Múgedektigi bar adamdarǵa qyzmet kórsetý talaptary ózgeredi
«Múmkindigi shekteýli balasy nemese azamaty bar otbasylaryna kórsetiletin arnaýly áleýmettik qyzmet kórsetý júıesin tolyǵymen qaıta qurý kózdelgen. Soǵan sáıkes tıisti tyń ózgerister qarastyryp otyrmyz. Birinshiden, múgedektigi bar adamdarǵa qyzmet kórsetý isine olardyń otbasy múshelerin tartý. Bul rette otbasy múshesi jeke kómekshi nemese áleýmettik qyzmetker retinde resimdeledi. Bul jumysqa eńbekaqy tólenedi jáne osy kiristen áleýmettik tólemder men zeınetaqy jarnalary aýdarylady», - dedi T. Dúısenova.
Osy oraıda mınıstr otbasynyń jumyspen qamtylmaǵan músheleri eńbekke qabiletti jasynda jumyspen qamtamasyz etiletinin aıtty.
«Ekinshiden, arnaýly áleýmettik qyzmetterdiń jańa standarttary daıarlap, jan basyna shaqqandaǵy normatıvterdi engizý qarastyrylyp otyr. Onyń mólsheri qyzmetter úshin jeke normatıv, al kompensatorlyq tehnıkalyq quraldar turǵysynda shekteýli baǵalar túrinde jikteletin bolady. Bul ózgerister bir jaǵynan keıbir jekelegen qyzmet nemese taýar túrlerin monetızatsııalaýǵa alyp keledi. Al ekinshi jaǵynan jeke sektor jaǵynan shaǵyn syıymdylyqty arnaıy qyzmet kórsetý ortalyqtarynyń ashylýyna múmkindik týǵyzatyn bolady. Bul sharalar otandyq tájirıbe, ıaǵnı bilim berý salasynda «Balapan» baǵdarlamasynyń úlgisi boıynsha engizilip otyr», - dedi mınıstr.
Sonymen qatar ol áleýmettik qyzmet portaly boıynsha jergilikti atqarýshy organdar janynda qurylǵan komıssııalarǵa jańa quzyretter berý qarastyrylyp otyr.
«Olarǵa múgedektegi bar azamattardyń sapasyz taýar nemese qyzmet týraly aıtylǵan ótinishterin áleýmettik qyzmet portaly arqyly qabyldaý jáne 5 kún ishinde qaraý, sondaı-aq ónim berýshige nemese qyzmet kórsetýshige berilgen taýar men kórsetilgen qyzmettiń sapasyn jóndeý jóninde hat joldaý jáne onyń oryndalýyn baqylaý quzireti beriledi. Munymen qosa, ónim berýshini nemese qyzmet kórsetýshini áleýmettik qyzmet portalynan alyp tastaý jáne ony mindettemelerin adal atqarmaıtyn ónim berýshi tizimine engizý týraly sheshim qabyldaı alatyn bolady», - dedi vedomsvtvo basshysy.
Budan bólek, áleýmettik qyzmetkerge qatysty talaptar men olardyń mártebesin eskeretin normalar engizildi.
«Osy oraıda áleýmettik jumyspen biliktiligi táýelsiz baǵalaýdan ótken jáne sertıfıkaty bar mamandar ǵana aınalysa alady. Múgedektigi bar azamattarǵa qyzmet kórsettetin mamandardy tańdaý úshin áleýmettik qyzmetkerlerdiń reestri jasalady. Onda onyń biliktiligi, kórsetken qyzmetteriniń túri jáne sapasy týraly tolyq málimet bolady. Sonymen birge, áleýmettik qyzmetkerlerdiń eńbekaqy tóleý júıesi jáne qoldaý sharalary qaıta qaralady. Eńbekaqy tóleýdiń jańa júıesi biliktilik deńgeıin, kórsetiletin qyzmetterdiń sanaty men ereksheligin eskeredi», - dedi mınıstr.
