Múgedektigi bar adamdardy elimizdiń saıası ómirine tartý qalaı júrip jatyr

NUR-SULTAN. QazAqparat – QR Eńbek jáne halyqty áleýmettik qorǵaý vıtse-mınıstri Erlan Áýkenov múgedektigi bar adamdardy memlekettiń saıası ári qoǵamdyq ómirine tartý boıynsha atqarylyp jatqan jumystar jaıynda aıtty, dep habarlaıdy QazAqparat tilshisi.

«Ózderińiz bilesizder, ómir súrý sapasyn jaqsartý men azamattar quqyqtaryn júzege asyrýdyń negizgi baǵyttary 2025 jylǵa deıingi Ulttyq josparmen bekitilgen. Onda eskerilgen sharalar Qazaqstandaǵy barsha múmkindigi shekteýli jandardyń máselesin qamtyp otyr. Bul turǵyda 700 myńnan astam eskerilgen», - dedi E. Áýkenov «Múgedektigi bar adamdardyń saıası jáne qoǵamdyq ómirge qatysýlary» atty dóńgelek ústel otyrysynda.

Onyń aıtýynsha, jospardyń sharalaryn oryndaý máselesi 17 qyrkúıekte múgedekterdi áleýmettik qorǵaý salasyn jaqsartý máselesi boıynsha Úılestirý keńesinde qaraldy.

Osy oraıda alǵash ret Úılestirý keńesiniń músheleri ınternet-daýys berý arqyly saılandy. Daýys berýge 22 myńnan astam adam qatysqan edi.

E. Áýkenovtyń paıymynsha, bul óz kezeginde múmkindigi shekteýli jandardy eldiń saıası ómirine tartýda jaqsy qadam boldy.

«Meniń oıymsha, bul sharalar múgedektigi bar adamdardyń ómir súrý sapasyn jaqsartý boıynsha saıasatty aıqyndaýdaǵy mańyzdy sheshim jasaıtyn organdarda óz ókilderin tańdaý kezindegi jaqsy qadam bolyp otyr», - dedi vıtse-mınıstr.

Budan buryn habarlanǵandaı, QR Eńbek jáne halyqty áleýmettik qorǵaý mınıstrligi 2021 jylǵy 10 qańtarda ótetin Parlament Májilisi men máslıhat depýtattarynyń saılaýynda múgedektigi bar adamdar úshin qoljetimdi ortany qamtamasyz etý maqsatynda aýmaqtyq saılaý komıssııalary úshin birqatar usynymdar ázirledi.

QR Eńbekmıni Ortalyq saılaý komıssııasynyń nusqaýlyǵyna sáıkes múgedektigi bar adamdar úshin saılaý ýchaskeleriniń qoljetimdiligin qamtamasyz etýdi usynady. Atap aıtqanda, pandýstar, shaqyrý knopkalaryn, taktıldi plıtkalar, monıtory bar kompıýterler, qosymsha jaryqtandyrý, trafaretter jáne t. b. ornatýdy qamtamasyz etý qajet. Budan basqa, onlaın-sýrdoaýdarma nemese ymdaý tili mamandarynyń kezekshiligi usynylady.

Sonymen qatar, saılaý ýchaskeleri ǵımarattyń birinshi qabatynan joǵary ornalasqan jaǵdaıda múgedektigi bar adamnyń arbasyna arnalǵan arnaıy lıft bolýy kerek.