Múgedekti jumysqa qabyldamaǵan kompanııa jazalanady - Nurymbetov

NUR-SULTAN. QazAqparat – Múgedekti jumysqa qabyldamaǵan kompanııa jazalanady. Bul týraly búgin Úkimet úıindegi baspasóz máslıhatynda QR Eńbek jáne halyqty áleýmettik qorǵaý mınıstri Birjan Nurymbetov aıtty, dep habarlaıdy QazAqparat tilshisi.

«Búginde elimizde múgedektigi bar 690 adam bar. Onyń 424 myńy jumysqa qabiletti bolǵanymen, 224 myńy ǵana jumys isteı alady. Qazirgi ýaqytta olardyń 106 myńy eńbek etip júr. Biz olardyń ekonomıkalyq belsendiligin arttyrý boıynsha ózimizge mindet qoıdyq. Mynadaı problema bar – múdegektigi bar adamdardy jumysqa almaıdy. Zańnamamyzǵa sáıkes, jergilikti atqarýshy organdar kásiporyndarǵa kvota bekite alady. Qazirgi ýaqytta 2-den 4 paıyzǵa deıin mólsherde. Bul kvotada 14,5 myń birlik bolǵanymen, oryndalmaı keledi», - dedi ol.

Onyń aıtýynsha, bul máseleni sheshý úshin álemdik tájirıbe zerdelengen. Aıtalyq, Kanadada mundaı kvotany oryndamaǵan kompanııalar memlekettik satyp alýlarǵa jiberilmeıdi. Al Germanııa men Japonııada kompanııa múgedektigi bar adamdy jumysqa qabyldamasa, onda ótemaqy tóleýge májbúr bolady.

«Biz osy ıdeıalardy qaperge aldyq, endi ázirleıtin bolamyz. Tetikterin, kólemi qansha bolýy kerektigin oılastyryp jatyrmyz. Ol múgedektigi bar adamdy oqytyp, basqa jerge jumysqa ornalastyrý úshin jetkilikti bolýy tıis. Búginde bul ıdeıa deńgeıinde ǵana tur. Bizde zań jobasynyń tujyrymdamasy bar. Zań jobalaý jumysy josparyna sáıkes ony 2020 jyly qabyldaý kerek», - dedi Birjan Nurymbetov.