Múgedektigi joq adamdar da medıtsınalyq kórsetilimder boıynsha estý protezimen tegin qamtylmaq

ASTANA. KAZINFORM – Densaýlyq saqtaý mınıstrliginiń buıryǵymen Qazaqstan halqyna sýrdologııalyq kómek kórsetý qaǵıdalaryna ózgerister men tolyqtyrýlar engizildi.

- Múgedektigi bar adamdardy estý fýnktsııasynyń buzylýyn óteıtin medıtsınalyq buıymdarmen qamtamasyz etý jáne aýystyrý «Múgedektigi bar adamdy abılıtatsııalaýdyń jáne ońaltýdyń jeke baǵdarlamasyna sáıkes múgedektigi bar adamdardy protezdik-ortopedııalyq kómekpen, tehnıkalyq kómekshi (kompensatorlyq) quraldarmen, arnaýly júrip-turý quraldarymen, olardy aýystyrý merzimderin qosa alǵanda, qamtamasyz etý qaǵıdalaryn bekitý týraly» Qazaqstan Respýblıkasy Premer-Mınıstriniń orynbasary – Eńbek jáne halyqty áleýmettik qorǵaý mınıstriniń 2023 jylǵy 30 maýsymdaǵy № 287 buıryǵyna jáne «Múgedektigi bar adamdarǵa beriletin tehnıkalyq kómekshi (ornyn toltyrýshy) quraldardyń, arnaýly júrip-turý quraldarynyń jáne kórsetiletin qyzmetterdiń synyptaýyshyn bekitý týraly» Qazaqstan Respýblıkasy Premer-Mınıstriniń orynbasary - Eńbek jáne halyqty áleýmettik qorǵaý mınıstriniń 2023 jylǵy 30 maýsymdaǵy № 284 buıryǵyna sáıkes júrgiziledi, - delingen qujatta.

Qujatqa sáıkes, múgedektigi joq adamdarǵa medıtsınalyq kórsetilimder boıynsha estý protezi kómegin usyný jergilikti ókildi organdardyń sheshimi boıynsha júzege asyrylady. Múgedektigi joq adamdardy medıtsınalyq kórsetilimder boıynsha estý protezi kómegimen qamtamasyz etýdi jergilikti atqarýshy organdar júzege asyrady.

Oblystardyń, respýblıkalyq mańyzy bar qalalardyń jáne astananyń densaýlyq saqtaýdy memlekettik basqarýdyń jergilikti organdary óz quzyreti sheginde: múgedektigi joq adamdardy medıtsınalyq kórsetilimder boıynsha estý protezi kómegimen qamtamasyz etý úshin medıtsınalyq buıymdardy satyp alýdy júzege asyrady.

Estý fýnktsııasynyń 1, 2, 3, 4 dárejedegi sozylmaly (qaıtymsyz) buzylýy bar, múgedektik dárejesi joq adamdardy estý fýnktsııasynyń buzylýyn óteıtin medıtsınalyq buıymdarmen qamtamasyz etý jáne aýystyrý jergilikti bıýdjet qarajaty esebinen júrgiziledi.

Estý apparattarymen estýdi protezdeý otorınolarıngolog (sýrdolog) dárigerdiń qorytyndysy boıynsha estýdi aýdıologııalyq zerttep-qaraýdan keıin júzege asyrylady.

Ortańǵy qulaqty nemese súıek ótkizgishtigin ımplanttaý júıesin ornatqannan keıingi birinshi jyly aýdıo-(sóıleý) protsessoryn baptaý keminde 4 ret, ekinshi jyly  keminde 2 ret, kelesi jyldary keminde jylyna 1 ret júrgiziledi.

Ortańǵy qulaq jáne súıek ótkizgishtigi ımplanttaryna arnalǵan sóıleý (aýdıo) protsessorlaryn aýystyrý 5 jylda 1 ret jergilikti bıýdjet qarajaty esebinen júzege asyrylady.

Aıta keteıik, múgedektigi bar adamdarǵa áýe bıletterine jeńildik jasaý týraly zań qaıta qaralady.